Հոկտեմբերի 2-ին ԱԳՆ-ում տեղի ունեցավ ՀՀ կառավարության եւ քաղաքացիական հասարակության կազմակերպությունների ներկայացուցիչների միջեւ քննարկում, որի նպատակն էր անդրադառնալ ՀՀ-ԵՄ Համապարփակ եւ ընդլայնված գործընկերության համաձայնագրի(ՀԸԳՀ) կիրարկման միջոցառումների ծրագրի՝ ճանապարհային քարտեզի կազմման գործընթացին, ինչպես նաեւ հոկտեմբերի 15-ին Լյուքսեմբուրգում կայանալիք ԱլԳ նախարարական հանդիպմանն ընդառաջ՝ հայաստանյան քաղհասարակությանը ներկայացնել օրակարգային հարցերը:
ԱԳն-ից NEWS.am-ին հայտնում են, որ հանդիպումը, որին մասնակցում էին ՀՀ փոխվարչապետ Մհեր Գրիգորյանը, ՀՀ արտաքին գործերի փոխնախարար Կարեն Նազարյանը, տնտեսական զարգացման ու ներդրումների նախարար տեղակալ Մանե Ադամյանը, արդարադատության նախարարի տեղակալ Վիգեն Քոչարյանը, բնապահպանության նախարարի առաջին տեղակալ Իրինա Ղափլանյանը, էներգետիկ ենթակառուցվածքների եւ բնական պաշարների նախարարության ներկայացուցիչը, հայաստանյան քաղհասարակության շուրջ հինգ տասնյակ կառույցների ղեկավարներ եւ անդամներ, նախագահում էր ԱԳ նախարար Զոհրաբ Մնացականյանը:
Բացման խոսքում նախարար Մնացականյանն ընդգծեց, որ Համապարփակ եւ ընդլայնված գործընկերության համաձայնագիրը, հանդիսանալով բավականին ծավալուն փաստաթուղթ, վերաբերում է հասարակական կյանքի գրեթե բոլոր բնագավառներին: Այս համատեքստում ԱԳՆ ղեկավարն ընդգծեց համաձայնագրի կիրարկման գործընթացում քաղհասարակության հետ երկոխոսության կարեւորությունը՝ հավելելով, որ քաղհասարակությունը հանդիսանում է այդ գործընթացի անմիջական մասնակիցը:
Հանդիպմանը կարեւորվեց Համաձայնագրի կիրարկումը մշտադիտարկելու նպատակով քաղհասարակության հարթակի ձեւավորումը թափանցիկության, ներառականության եւ ռոտացիայի սկզբունքների հիման վրա: Մասնակիցները պայմանավորվեցին շարունակական դարձնել այս ձեւաչափով երկխոսությունը:
