Մեր կառույցի նպատակը ազատ եւ բարեխիղճ տնտեսական մրցակցության խթանումն է, դրա համար անհրաժեշտ պայմանների ապահովումը, ինչպես նաեւ ձեռնարկատիրության զարգացմանը աջակցելն ու սպառողների իրավունքների պաշտպանությունը։ Այս մասին այսօր՝ հոկտեմբերի 19-ին խորհրդարանում Տնտեսական մրցակցության հանձնաժողովի նիստին Տնտեսական մրցակցության պաշտպանության պետական հանձնաժողովի (ՏՄՊՊՀ) 2019 թվականին տնտեսական մրցակցության պաշտպանության տարեկան ծրագրի քննարկման ժամանակ ասաց հիմնական զեկուցող, ՏՄՊՊՀ նախագահ Արտակ Շաբոյանը:
Նրա խոսքով՝ վերջին տարիներին կառույցը բազմաթիվ ուսումնասիրություններ է կատարել ապրանքների իրացման տարբեր շուկաներում բիզնես համայնքի եւ սպառողների իրավունքները պաշտպանող հասարակական կազմակերպությունների հետ համատեղ՝ նպատակ ունենալով հայտնաբերել հանրապետությունում տնտեսական մրցակցության ոլորտում խնդիրները եւ հնարավորությունները։
Պաշտոնյան գոհունակությամբ նշեց, որ Հայաստանը այն երկրների շարքում, որոնք պայքար են մղում մենաշնորհի դեմ եւ ապահովում են տնտեսական մրցակցության պաշտպանությունը, գրավում է 28-րդ հորիզոնականը։ «Հանձնաժողովի կողմից անցկացված ուսումնասիրությունները ցույց են տվել, որ վերջին տարիներին մեր կողմից նախաձեռնված օրենսդրական փոփոխությունները ու տնտեսական մրցակցության պաշտպանության միջազգային լավագույն պրակտիկայի ներդրումը էականորեն բարելավել է մրցակցային միջավայրը Հայաստանում»,–հավելեց ՏՄՊՊՀ նախագահը։
Շաբոյանը նաեւ հավաստիացրեց, որ փոփոխություններ են արձանագրվել այդ թվում այնպիսի ապրանքների շուկայում, որոնք ավանդաբար համարվում էին մենաշնորհի բարձր մակարդակի ռիսկ ունեցող։
Նա նկատեց, որ ՏՄՄՊՀ գործունեության 2019 թվականի տարեկան ծրագրում նախատեսվում է տնտեսական մրցակցության ոլորտում իրավիճակի վերլուծություն եւ գոյություն ունեցող խնդիրների հայտնաբերում, ՏՄՊՊՀ գործունեության ժամկետների որոշում եւ միջոցառումների իրականացում, տնտեսական մրցակցության մեխանիզմների ձեւավորում, ինչպես նաեւ մրցակցային միջավայրի բարելավմանն ուղղված առաջարկների ներկայացում՝ օրենսդրությամբ սահմանված խնդիրների եւ գործառույթների իրականացման նպատակով: