Թավշյա հեղափոխությունից հետո տեղական ինքնակառավարման ոլորտում մրցակցային կուսակցական միջավայր դեռ չի ձևավորվել։ Այս մասին այսօր՝ հոկտեմբերի 19–ին լրագրողների հետ հանդիպմանն ասաց Հայաստանի համայնքների միության նախագահ Էմին Երիցյանը։
Նրա գնահատմամբ՝ առաջիկա ՏԻՄ ընտրությունները նախորդների պես աչքի են ընկնում կուսակցությունների պասիվ մասնակցությամբ։
«Եթե նախկինում ՏԻՄ ընտրություններում հիմնական թեկնածուները ՀՀԿ–ի ներկայացուցիչներ էին, հիմա ՔՊ–ից են. անունները փոխվել են, բայց որակական փոփոխություն կարծես չունենք»,–նկատեց նա։
Երիցյանի խոսքով՝ նախկինի օրինակով, ներկայումս էլ ՏԻՄ ընտրություններում թեկնածուները հիմնականում ինքնաառաջադրվում են։
«Հայաստանում քաղաքական ուժերը տեղական ինքնակառավարումը երկրորդական են ընկալում։ Հեղափոխությունից հետո տեղական ինքնակառավարման ոլորտում մրցակցային կուսակցական միջավայր դեռ չի ձևավորվել՝ անկախ նրանից, որ այսօրվա իշխանությունը հասարակական մեծ աջակցություն է վայելում»,–ասաց նա։
Ամփոփելով ՏԻՄ ընտրություններում թեկնածուների նախընտրական քարոզչությունն ու ներկայացրած ծրագրերը, բանախոսը նկատեց, որ թեկնածուներն իրենց քարոզչության հիմքում դնում են հեղափոխությունը և քաղաքական հարցերը, մինչդեռ, ըստ նրա՝ ցանկալի կլիներ շեշտը դնել տեղական խնդիրներին վերաբերող հարցերի վրա։
Հիշեցնենք, որ հոկտեմբերի 21-ին Հայաստանի 9-ը մարզերի 49 համայնքում՝ այդ թվում Հրազդանում, Էջմիածնում, Արմավիրում և Կապանում տեղի կունենան տեղական ինքնակառավարման մարմինների ընտրություններ: