Որպեսզի էեկտրաէներգիայի սակագինը 5 դրամով իջնի, 27 մլրդ դրամ է պետք: Այս մասին, այսօր՝ հոկտեմբերի 26-ին, Գազի եւ էլեկտրաէներգիայի սակագների հարցով ԱԺ Քննիչ հանձնաժողովի 2-րդ նիստում հայտարարեց հանձնաժողովի նախագահ, ԱԺ փոխնախագահ Միքայել Մելքումյանը:
«Ես չեմ ուզում, որ սկզբում կամայական թիվ ասել, թե որքան պետք է սակագինը իջնի, հետո սկսենք այդ գումարը հայթայթել: Կա անհրաժեշտ հասույթի բանաձեւ. սյսինքն եթե ուզում ես ունենալ սակագինը, պետք է մի քանի բաղադրիչներ գումար լինի՝ արտադրող կայաններից գնման ծավալ, գումարած ՀԷՑ-ի պահպանման, շահագործման ծախսեր, գումարած մաշվածք, գումարած անհուսալի դեբիտորներ, գումարած հարկեր, գումարած շահույթի նորմա: Այդ բոլորը տալիս է հասույթը եւ դրանից կախված սահմանվում է սակագինը»,-ասաց Մելքումյանը:
Նա տեղեկացրեց, որ ՀԷՑ-ում շահութաբերությունը 17 տոկոս է հարկերը ներառյալ, կորուստները կազմում են 11,02 տոկոս. «10 տարվա ներդրումային ծրագրով նախատեսվում է կորուստների չափը իջեցնել 7,5 տոկոսի, 10 տարի հետո իջներում է 6 տոկոսի»:
Միքայել Մելքումյանի խոսքով, երբ հետագայում գործարկվի Իրան-Հայաստան բարձրավոլտ էլեկտրահաղորդման գծերը, այստեղ մենք բավականին շահելու ենք, որովհետեւ Երեւանի ՋԷԿ-ի ներքին սակագինը բավականին իջնելու է. «Այսօր Երեւանի ՋԷԿ-ը 20 դրամով է էլեկտրաէներգիա արտադրում, որը ՀԷԿ-երից ավելի ցածր է: Որքան մեծացնեք Իրանից եկող գազի ծավալը, այնքան բարերար ազդեցություն ենք ունենալու էլեկտրաէներգիայի սակագնի վրա: Բայց պետք է հաշվի առնենք, որ ամբողջ գազատար համակարգը «Գազպրոմ Արմենիայի» տնօրինման եւ տիրապետման տակ է»,-ընդգծեց հանձնաժողովի նախագահը: