Հայաստանում արտահերթ խորհրդարանական ընտրությունների արդյունքները որեւէ կերպ կապված չեն ղարաբաղյան հակամարտության կարգավորման հետ: Այս մասին հոկտեմբերի 26-ին՝ Ազգային ժողովում ճեպազրույցի ժամանակ հայտարարեց Հայաստանի Հանրապետական կուսակցության խորհրդարանական խմբակցության ղեկավար Վահրամ Բաղդասարյանը:
Նրա կարծիքով, դրանք ոչ մի կերպ չեն կարող ազդել այս հակամարտության լուծման գործընթացի վրա` ոչ դրական, ոչ էլ բացասական:
Նա նաեւ մասնավորապես մեկնաբանեց ԱՄՆ նախագահի ազգային անվտանգության հարցերով խորհրդական Ջոն Բոլթոնի հայտարարությունն այն մասին, որ եթե դեկտեմբերին կայանալիք ընտրություններից հետո Նիկոլ Փաշինյանի կուսակցությունը մեծ մանդատ ունենա, դա լավ հնարավորություն կլինի ղարաբաղյան հակամարտության կարգավորման ուղղությամբ վճռական քայլերի ձեռնարկման համար:
«Ես լուծում չեմ տեսնում: Եվ Ղարաբաղի ժողովուրդը, եւ Հայաստանի ժողովուրդը, եւ Ադրբեջանի ժողովուրդը դեմ են այն տարբերակներին, որոնք քննարկվում են: Բոլորը կարծես թե դեմ են դրանց», - բացատրեց Բաղդասարյանը` հավելելով, որ ինքը պատկերացում չունի, թե ընդհանրապես ինչ կարգավորման մասին է խոսքը, եւ ինչ ընդհանուր հայտարարի կարելի է գալ այս հարցում:
Նկատառմանը, թե հասարակության վստահությունը վայելող իշխանությունը ավելի հեշտ կարող է լուծում գտնել, ՀՀԿ խմբակցության ղեկավարը նշեց, որ ստացվում է, որ իշխանությունները պետք է հրապարակում հանրահավաք հավաքեն եւ ասեն. «Հարգելի ժողովուրդ, մենք վերադարձնում ենք մեր ազատագրված տարածքները»:
Վահրամ Բաղդասարյանը շեշտեց, որ առաջնային խնդիր կա` Լեռնային Ղարաբաղի ժողովրդի ինքնորոշման իրավունքի ճանաչում, որից հետո հնարավոր կլինի նոր բանակցային փուլ անցնել: