Միջին եւ փոքր հեռահարության հրթիռների մասին պայմանագրից ԱՄՆ-ի դուրս գալը վկայում է այն մասին, որ Վաշինգթոնը պատերազմի է պատրաստվում, հայտարարել է ՌԴ ԱԳՆ սպառազինության չտարածման եւ վերահսկողության հարցերով դեպարտամենտի ղեկավարի տեղակալ Անդրեյ Բելոուսովը, փոխանցում է «ՌԻԱ Նովոստի»-ն:
Գործակալությունը հայտնում է, որ դիվանագետն այս մասին հայտարարել է, երբ ՄԱԿ Գլխավոր ասամբլեայի Առաջին կոմիտեն մերժել է ՄՓՀՀՊ մասին ռուսական բանաձեւի նախագիծը քննարկման դնել:
Ընդ որում՝ Ռուսաստանը պատրաստ է պաշտպանել իրեն եւ իր շահերը, նշել է դիվանագետը:
«Վերջերս այստեղ կայացած նիստի ժամանակ Միացյալ Նահանգները հայտարարեց, որ Ռուսաստանը պատերազմի է պատրաստվում: Այո՛, Ռուսաստանը պատրաստվում է պատերազմի, ես դա հաստատում եմ: Այո՛, մենք պատրաստվում ենք պաշտպանել մեր Հայրենիքը, մեր տարածքային ամբողջականությունը, մեր սկզբունքները, մեր մարդկանց: Մենք այսպիսի պատերազմի ենք պատրաստվում: Բայց մեր եւ Միացյալ Նահանգների միջեւ մեծ տարբերություններ կան: Ռուսաստանի Դաշնությունը պատրաստվում է պատերազմի, իսկ Ամերիկայի Միացյալ Նահանգները պատրաստում է պատերազմը»,- ասել է Բելոուսովը կոմիտեում քվեարկության արդյունքներից հետո:
«Այլապես, ի՞նչ նպատակ ունի պայմանագրից Միացյալ Նահանգների դուրս գալը, միջուկային զինանոցը մեծացնելը, նոր միջուկային հայեցակարգ ընդունելը, որը նվազեցնում է միջուկային զենքի կիրառման մակարդակը: Ահա սա է բոլորի համար հարց»,- հավելել է դիվանագետը:
ՄԱԿ Գլխավոր ասամբլեայի Առաջին կոմիտեն մերժել է ռուսական բանաձեւի նախագիծը, քանի որ դեմ է քվեարկել 55 երկիր: Կողմ է արտահայտվել 31 պետություն, ձեռնպահ է մնացել 54-ը: Դեմ քվեարկածների թվում են ԱՄՆ-ն, Մեծ Բրիտանիան, Կանադան, Արգենտինան, Հունաստանը, Ֆրանսիան եւ Ուկրաինան
