Այսօր Հայաստանի տնտեսության մեջ տեղի են ունենում խիստ դրական, առողջացման պրոցեսներ, որոնք բերելու են մեր առջեւ դրված նպատակների իրագործմանը: Այս մասին, այսօր՝ նոյեմբերի 1-ին, ԱԺ-ում վարչապետի ընտրության հարցի քննարկման ժամանակ նշեց վարչապետի պաշտոնակատար, վարչապետի միակ թեկնածու Նիկոլ Փաշինյանը:
«ՀՀ տնտեսությունում այս պահին որեւէ անառողջ գործընթաց տեղի չի ունենում: Ընդհակառակը, թույլ տվեք հայտարարել, որ ՀՀ-ում տեղի է ունենում տնտեսական առողջացման եւ տնտեսական տրանսֆորմացիայի մեկնարկ: Հայաստանը ագրարային, հանքարդյունաբերող, ընդերք քանդող եւ խաղադրույք կատարող երկրից պետք է վերածվենք տեխնոլոգիական արտադրանքի եւ արտահանմանը միտված երկրի: Հենց այսօր այդ գործընթացը տեղի է ունենում ՀՀ-ում»,- ասաց նա:
Փաշինյանը ասվածը հիմնավորելու համար փաստեր ներկայացրեց՝ նշելով. «Կառավարությունն ունի գործիք, որ գերակա ոլորտում ներդրումներ իրականացնող եւ որոշակի չափանիշների համապատասխանող ընկերություններին ազատում է մաքսատուրքից եւ ԱԱՀ-ն հետաձգում է: Այդ ոլորտում վերջին 6 ամիսների ներդրումների վերլուծությունը ցույց է տալիս, որ եթե հանում ենք հանքարդյունաբերության ոլորտը, մնացած ոլորտներում ներդրումները 9 ամսում աճել են ուղիղ 70 տոկոսով, իսկ աշխատատեղերը՝ 30 տոկոսով: Այսինքն 70 տոկոսով ավելացել են այնպիսի սարքավորումների ներկրումը, որոնք հանքարդյունաբերությանը, խաղադրույքներին չեն վերաբերում, որոնք վերաբերում են ժամանակակից տեխնոլոգիական մրցունակ արտադրանքի թողարկմանը»,-ասաց վարչապետի պաշտոնակատարը:
Բացի այդ, ըստ նրա, 2018-ի առաջին 9 ամիսների ընթացքում կապիտալ ապրանքների ներկրումն աճել է 75,5 տոկոսով. «Խոսքը սարքեր, սարքավորումներ ներկրելու մասին է: Բացի այդ, 20 տոկոսով ավելացել է հումքի ներկրումը, որը պետք է օգտագործվի արդյունաբերության մեջ»:
Հաջորդ փաստն, ըստ Փաշինյանի այն է, որ արդյունաբերության ոլորտում սեպտեմբերին գրանցվել է 0,9 տոկոս աճ, որը բավականին ցածր է նախորդ տարվանից, բայց եթե հանենք հանքարդյունաբերությունը, ապա կտեսնենք, որ օրինակ վերամշակող արդյունաբերությունը այս տարվա 9 ամիսներին ունեցել է 11,4 տոկոս աճ: