Գորիս-Կուբաթլի ավտոճանապարհին զինծառայողների տեղափոխող բեռնատարում եղել են 21 զինծառայող, որից 19-ը թափքում: Այս մասին իր ֆեյսբուքյան էջում գրել է ՀՀ ՊՆ մամլո խոսնակ Արծրուն Հովհաննիսյանը։
Նա նշել է, որ 21-ից 17 զինծառայողի կյանքին վտանգ չի սպառնում, 8-ը ստացել են տարբեր տեսակի մարմնական վնասվածքներ: Բուժզննումը շարունակվում է:
Վիրավորված զինծառայողներին տեղափոխել են Սիսիանի հոսպիտալ եւ Գորիսի ԲԿ:
Նախնական տեղեկություններով՝ տուժած զինծառայողներից մեկը ունի կոտրվածքներ. «Ծայրահեղ ծանր վիճակ չկա ոչ մեկի մոտ: Նոր տեղեկություններ կհայտնենք»,–գրել է Հովհաննիսյանը։
Ավելի վաղ հայտնել ենք, որ այսօր՝ նոյեմբերի 7-ին, խոշոր ու ողբերգական ավտովթար է տեղի ունեցել Գորիս-Կուբաթլու ավտոճանապարհի 39 կմ հատվածում։
Shamshyan.com-ի փոխանցմամբ, ՀՀ ՊՆ համարանիշներով բեռնատար ավտոմեքենան ժամը 12։00-ի սահմաններում Գորիսից դեպի Կուբաթլի ճանապարհին վթարի է ենթարկվել, ինչի հետեւանքով 4 զինվոր մահացել է, կան մի քանի վիրավորներ։
Վթարի հետեւանքով զոհվել են 20–ամյա զինծառայողներ Հայրապետ Վոլոդյայի Նաիրյանը (2017/1 զորակոչ, Էրեբունու ԶԿ), Հրանտ Արայի Գասպարյանը, (2017/1 զորակոչ, Շահումյանի ԶԿ), Էդգար Արմենի Հունանյանը (2017/1 զորակոչ, Հրազդանի ԶԿ), Դավիթ Բենիամինի Մելքոնյանը (2017/1 զորակոչ, Թալինի ԶԿ)։