Հայաստանն ԱՄՆ-ից սպառազինություն գնելու առաջարկ չի ստացել: Այս մասին ՏԱՍՍ-ի հետ հարցազրույցում հայտարարել է Հայաստանի ԱԳ նախարարի պաշտոնակատար Զոհրաբ Մնացականյանը՝ մեկնաբանելով ԱՄՆ նախագահի խորհրդական Ջոն Բոլթոնի հայտարարությունը Հայաստանի կողմից ամերիկյան սպառազինություն ձեռք բերելու մասին եւ վարչապետի պաշտոնակատար Նիկոլ Փաշինյանի արձագանքն այն մասին, որ ձեռնտու առաջարկ ստանալու դեպքում հայկական կողմը կքննարկի նման հնարավորությունը:
Նրա խոսքով՝ Հայաստանը ոչ մի առաջարկ չի ստացել: «Դրանից բացի, մեր երկիրը գտնվում է չափազանց զգայուն տարածաշրջանում, որտեղ չկարգավորված հակամարտություն կա, եւ խաղաղության ու կայունության, ինչպես նաեւ խաղաղության հաստատմանը նպաստող մթնոլորտին հասնելը մեզ համար չափազանց կարեւոր հարցեր են: Նման պայմաններում սպառազինության մրցավազքը ծայրահեղ վտանգավոր երեւույթ է:
Երբ մենք մեր գործընկերներին դժգոհություն ենք հայտնում Ադրբեջանին զենք վաճառելու հետ կապված, շեշտում ենք, որ չենք կարող այդ փաստին վերաբերվել որպես բիզնես գործարքի, այլ որպես զենքի, որը կոնկրետ մեր հայրենակիցների, մեր զինվորների, քաղաքացիական բնակչության կյանքն է խլում: Այնպես որ, մեր տարածաշրջանում նման պայմաններում սպառազինության մրցավազքը միանգամայն վտանգավոր է:
Լեռնային Ղարաբաղի հակամարտությունն առաջին հերթին մարդկանց է առնչվում, խոսքը 150 հազար մարդու ֆիզիկական անվտանգության մասին է, եւ մենք արել ենք եւ կանենք հնարավոր ամեն ինչ նրանց գոյատեւման պատշաճ անվտանգության ապահովման համար:
Բնականաբար, ոչ ոք չի կարող կասկածի ենթարկել որպես այս մարդկանց անվտանգության երաշխավոր գործելու մեր մարտունակությունն ու վճռականությունը: Միաժամանակ, մեկ անգամ եւս հատուկ շեշտում եմ հակամարտության բացառապես խաղաղ կարգավորմանը Հայաստանի հանձնառությունը»,- նշել է Մնացականյանը:
