Վրաստանի նախագահ Միխայիլ Սահակաշվիլին կարծում է, որ Ռուսաստանը կխոչնդոտի Հայաստանի եւ Թուրքիայի միջեւ հարաբերությունների զարգացմանը, ինչպես նաեւ Ղարաբաղի խնդրի լուծմանը: Նման կարծիք նա հայտնել է ԱՄՆ պաշտպանության փոխնախարար Վերշբոուի հետ հանդիպման ժամանակ:
Ըստ WikiLeaks-ի, այս խոսակցության մասին պաշտոնական հեռագիր է հղել ամերիկացի դիվանագետ Ջոն Բասը:
«Սահակաշվիլին կարծիք է հայտնել, որ Հարավային Կովկասում սահմանների բացումը, մասնավորապես, Հայաստանի եւ Թուրքիայի միջեւ, ինչպես նաեւ ԼՂ կարգավորման գործընթացում հնարավոր առաջընթացը հակասում է Ռուսաստանի շահերին: Ռուսաստանը ցանկացած փոխզիջման դեմ է եւ նախընտրում է, որ Հարավային Կովկասում հակամարտությունները մնան ու սահմաններն էլ չբացվեն: Սահակաշվիլին ասել է, որ Մոսկվան սպասում է, որ ԱՄՆ-ը մի կողմ քաշվի, իսկ Ռուսաստանը շարունակի աճպարարությամբ զբաղվել տարածաշրջանային հակամարտությունների հետ, որոնք շատ զգայուն են ԱՄՆ-ի համար՝ Իրան, Թուրքիա եւ Վրաստան»,- ասված է ամերիկացի դիվանագետի հեռագրում, որը հրապարակել է WikiLeaks-ը:
