Հաքերները կարողանում են կոտրել հին iPhone-ները եւ Mac-ը՝ կեղծ կայքերի միջոցով, աննկատելի փոխելով դոմենային անվան տառը, հայտնում է «Լենտան»՝ վկայակոչելով Tencent Security Xuanwu Lab-ի կիբեռանվտանգության ոլորտի փորձագետների հայտարարությունը, որը հրապարակվել է ընկերության բլոգում:
Նրանք պնդում են, որ Safari բրաուզերի հին տարբերակներում Յունիկոդի խորհրդանշանները նույնկերպ են պատկերվում, ինչպես սովորական տառերը: Մասնավորապես՝ լատիներեն d տառը որոնման տողում կերեւա ճիշտ այնպես, ինչպես dum խորհրդանշանը: Ընդ որում՝ օգտատերերը տարբերությունը չեն նկատի եւ կեղծված հղումը չեն տարբերակի:
Սա խարդախներին թույլ է տալիս կեղծել հանրահայտ կայքերի էջերը, որոնցում օգտագործվում է d տառը՝ LinkedIn, Dropbox, Reddit, Wordpress եւ այլն:
Մասնագետների հայտնաբերած խոցելիությունը սպառնում է Apple-ի սմարթֆոնների եւ համակարգիչների տերերին, որոնց վրա տեղադրված չէ ՕՀ վերջին թարմացումը: Հնարավոր վտանգավոր սարքերի թվում նշվում են iOS 11.4.1 եւ ավելի հին iPhone-ի տարբերակները, ինչպես նաեւ iMac-ը եւ MacBook-ը՝ մինչեւ 10.13.5 macOS High Sierra-ով: Խարդախների զոհը չդառնալու համար մասնագետները խորհուրդ են տալիս ՕՀ տարբերակը թարմացնել մինչեւ ամենաարդիական տարբերակ: