ԱՄՆ նախագահի վարչակազմը քննարկում է գերմանական երեք խոշորագույն ավտոարտադրողների ղեկավարության հետ զրույցի հնարավորությունը, հայտնում է The Wall Street Journal-ը (WSJ):
Պարբերականի սեփական աղբյուրները հայտնել են, որ ցանկանում են Սպիտակ տուն հրավիրել Volkswagen-ի, BMW-ի եւ Daimler-ի ղեկավարներին: Նրանց հետ, հավանաբար, կհանդիպեն տնտեսության հարցերով խորհրդական Լոուրենս Քուդլոուն, առեւտրի նախարար Ուիլբուր Ռոսը եւ առեւտրի ներկայացուցիչ Ռոբերտ Լայթհայզերը: Հնարավոր է նաեւ կարճատեւ հանդիպում ԱՄՆ նախագահ Դոնալդ Թրամփի հետ:
Սպիտակ տունը ցանկանում է գերմանական ավտոարտադրողներին համոզել մեծացնել ԱՄՆ տարածքում արտադրությունը: Աղբյուրների փոխանցմամբ՝ ընկերություններին կառաջարկվի պահեստամասերի թողարկումն այնտեղ մեծացնել, ինչպես նաեւ կրճատել ԱՄՆ գործարաններում արտասահմանյան մասերի օգտագործումը:
