Կառավարությունը այսօրվա՝նոյեմբերի 22-ի իր նիստում որոշում կայացրեց ՀՀ Արագածոտնի, Լոռու, Գեղարքունիքի, Շիրակի, Սյունիքի եւ Կոտայքի մարզպետարաններին պահուստային ֆոնդից 205,706.373 հազար դրամի լրացուցիչ սուբվենցիա տարմադրել:

Հարցը ներկայացրեց Տարածքային կառավարման եւ զարգացման փոխնախարար Վաչե Տերտերյանը՝ նշելով, որ խոսքը վերաբերում է 23 համայնքներում 25 ծրագրերի:

Նա նշեց, որ Գեղարքունիքի մարզպետարանին կհատկացվի 80,239.3 հազար դրամ, Շիրակի մարզպետարանին՝ 21,875.2 հազար դրամ, Արագածոտնի մարզպետարանին՝ 26,352.7 հազար դրամ, Կոտայքի մարզպետարանին՝ 29,349.5 հազար դրամ, Սյունիքի մարզպետարանին՝ 37,013.7 հազար դրամ, Լոռու մարզպետարանին՝ 10,876.0 հազար դրամ:

Վաչե Տերտերյանը նշեց, որ արդեն հաստատված են 234 ծրագրեր, որից հավանություն է ստացել 176-ը: Նշված ծրագրային հայտերը հիմնականում ուղղված են համայնքներում կապիտալ ներդրումներին` մասնավորապես. համայնքներում փողոցների, այգիների, պուրակների, խաղահրապարակների բարեկարգմանը, համայնքային շենքերի, մշակութային տների, մանկապարտեզների, հանդիսությունների սրահների կառուցմանն ու նորոգմանը, խմելու, կոյուղու, ոռոգման ջրագծերի կառուցմանն ու նորոգմանը եւ գիշերային լուսավորության անցկացմանը:

Ծրագրերի ընդհանուր արժեքը կազմում է 726.248.290 ՀՀ դրամ եւ մրցույթների արդյունքներով այն կազմել է 532,185.760 ՀՀ դրամ, որից ՀՀ պետական բյուջեի համաֆինանսավորման մասը կազմում է 205,706.373 ՀՀ դրամ:

ՀՀ վարչապետի պաշտոնակատար Նիկոլ Փաշինյանը հայտարարեց, որ ցավոք, չկարողացան այս տարի իրենց նախանշած ցուցանիշին հասնել. «Մենք 10 մլրդ դրամի խնդիր էինք դնում, բայց համայնքները պատրաստ չեն դրան, մյուս տարի էլ պատրաստ չեն լինի: Ընդամենը 3 մլրդ դրամի մասին է լինելու խոսքը»:

Առաջին փոխվարչապետ Արարատ Միրզոյանն էլ հավելեց, որ շատ համայնքներում լավ չեն պատկերացնում այս սուբվենցիաների էությունը եւ ներկայացնում են օրինակ հանդիսությունների սրահի վերանորոգման կամ բիստրո կառուցելու ծրագրեր: