«Օրինաց երկիր» կուսակցության առաջնորդ Արթուր Բաղդասարյանը պարզաբանել է առաջիկա արտահերթ խորհրդարանական ընտրություններին քաղաքական ուժի մասնակցության պատճառները։
Նոյեմբերի 22–ին լրագրողների հետ հանդիպման ժամանակ ԱԽ նախկին քարտուղարը նշեց, իր ղեկավարած կուսակցությունն առաջին օրերից սատարել է «հեղափոխության հիասքանչ գործընթացին»։
Հայտարարությունը սրանով քաղցրացնելով՝ Արթուր Բաղդասարյանն այնուհետեւ անցավ քննադատելուն։ Նրա խոսքով՝ ընտրություններն առաջին հերթին անհրաժեշտ են հեղափոխության ձեռքբերումները կապիտալիզացնելու համար, իսկ ՕԵ–ն դրանց մասնակցում է, քանի որ բավականին մտահոգված է իշխող ուժի մոտ երկրի առաջ ծառացած խնդիրների լուծման ռազմավարության, երկրի զարգացման ծրագրի, ի վերջո՝ մասնագետների բացակայությամբ։ ՕԵ–ն վերջիններին սիրահոժար պատրաստ է տրամադրել իր շարքերից։
Հիշեցնենք, որ կուսակցությունը նախկինում բազմիցս իշխանությունների հետ կոալիցիա է կազմել, որոնց այսօր Արթուր Բաղդասարյանը համեմատեց «ավգյան ախոռների» հետ։ Բաղդասարյանը հընթացս հիշեցրեց, որ հեղափոխությունը կատարել է ժողովուրդը, իսկ Նիկոլ Փաշինյանը կարողացավ գործընթացը համախմբել։
Ներքին խնդիրները թվարկելով՝ Արթուր Բաղդասարյանը անցավ արտաքինին։ «Որպես անվտանգության հարցերին քաջածանոթ մարդ՝ ես աճող սպառնալիքներ ու մարտահրավերներ եմ տեսնում եւ դրանց հակազդելու անբավարար քայլեր ու ծրագրեր»,– հայտարարեց Բաղդասարյանը։ Նրա խոսքով՝ երկրի առջեւ ծառացել են նոր լրջագույն սպառնալիքներ ու մարտահրավերներ, իսկ այստեղ նաեւ աճող լարվածություն է առաջացել Հայաստանի ու ՀԱՊԿ–ի միջեւ, Իրանի դեմ ԱՄՆ նոր պատժամիջոցներ։
Ներկաներին բավականին «վախեցնելով»՝ Բաղդասարյանը հայտնեց, որ ՕԵ–ն ընտրություններին կմասնակցի «Օրինականություն, արդարություն եւ ապահովություն» կարգախոսով։
Հիշեցնելով օրինաստեղծ գործունեության մեջ կուսակցության «վիթխարի ավանդը»՝ Բաղդասարյանը հայտնեց, որ կուսակցությունը նոր Հայաստան կառուցելու համար 50 քայլ ունի։