Ստուգումների ընթացքում պետական միջոցների յուրացման դեպքեր են հայտնաբերվել։ Այս մասին այսօր՝ նոյեմբերի 24-ին, մամուլի ասուլիսի ժամանակ հայտարարեց ՀՀ տրանսպորտի, կապի եւ տեղեկատվական տեխնոլոգիաների նախարարի պաշտոնակատար Հակոբ Արշակյանը։
Նրա խոսքով՝ պետբյուջե է վերադարձվել մոտ 2 մլն դոլար. «Քննություն է ընթանում, եւ սա դեռ ավարտը չէ։ Մենք ուշադիր կհետեւենք բոլոր ծասերին»,–հայտարարեց նա։
Միաժամանակ, ինչպես նշել է նախարարի պաշտոնակատարը, իր ղեկավարած գերատեսչությունում շատ խիստ կհետեւեն շինարարական աշխատանքների որակին եւ կապահովեն պատշաճ հսկողություն ցեմենտի ու ասֆալտի որակի նկատմամբ։
Ընդհանուր առմամբ, Արշակյանի փոխանցմամբ, 2018 թվականին պետբյուջեից ճանապարհաշինական աշխատանքների համար նախատեսվում է հատկացնել 6.4 մլրդ դրամ, սակայն լրացուցիչ հատկացվել է 2.5 մլրդ դրամ։
«Այս միջոցներից մեզ հաջողվել է տնտեսել 2 մլրդ դրամ, որոնք ուղղվել են լրացուցիչ 14 կմ ճանապարհի վերանորոգմանն ու կառուցմանը, իսկ շուրջ 1 մլրդ դրամ վերադարձվել է պետբյուջե։ Արդյունքում վերանորոգվել է շուրջ 133.9 կմ ճանապարհ»,–հայտնեց նա։
Նախարարի պաշտոնակատարը նշեց, որ անորակ ճանապարհային աշխատանքների պատճառով պետությունը՝ ի դեմս կառավարության, իսկ մասնավորապես, ՀՀ տրանսպորտի, կապի եւ տեղեկատվական տեխնոլոգիաների նախարարությունը հարկադրել է այդ աշխատանքները իրականացրած ընկերություններին փոխհատուցել պատճառված վնասը, որոնք այդ ընկերությունների համար 300 մլն դրամ են արժեցել։
Նախարարը հավելեց նաեւ, որ, ընդհանուր առմամբ, վերանորոգվել է 62 կմ երկարությամբ 10 ճանապարհ։