Հայաստանը պետք է չեզոքություն պահպանի հակաիրանական պատժամիջոցների հարցում: Այս մասին լրագրողների հետ զրույցում ասաց քաղաքագետ Կարինե Գեւորգյանը:
Փորձագետը հիշեցրեց, որ Հայաստանի համար դժվարին տարիներին Իրանը երիտասարդ պետության համար կյանքի ճանապարհ էր: Ուստի, Գեւորգյանի խոսքով, հիմա օբյեկտիվ հարաբերությունները խաթարել ստիպելու փորձերը հակաամերիկյան զգացումներ են առաջացնում անգամ նրանց մոտ, ովքեր ամենեւին ռուսամետ տրամադրություններ չունեն: «Ես կցանկանայի, որ Հայաստանը չեզոքություն պահպաներ եւ Իրանի հետ հարաբերությունները չփչացներ, որովհետեւ դա երկար կհիշվի եւ ոչ վեհանձն քայլ կլինի»,- նշեց Կարինե Գեւորգյանը:
Պատասխանելով Իրանում գունավոր հեղափոխություններին նման գործընթացների հնարավորության մասին հարցին՝ քաղաքագետը նշեց, որ սկզբունքորեն միշտ ամեն տեղ ամեն ինչ կարող է տեղի ունենալ: Սակայն փորձագետը նման հեռանկարներին երկյուղով է վերաբերվում՝ իրանցիները բուռն են արձագանքում ճակատային «հարձակման» փորձերին եւ պատասխան են տալիս, հասարակությունն էլ համապատասխանաբար համախմբվում է: «Ամերիկացիները փորձում էին Իրանը փակ երկիր ներկայացնել, իսկ դա այդպես չէ: Իրանցիները սովորում են, ուղեւորություններ կատարում եւ ամեն ինչ հասկանում են: Եվրոպայի եւ Ամերիկայի նկատմամբ ոչ մի պատրանք չունեն անգամ լուսավորյալ անձինք, որոնք անչափ քննդատաբար են վերաբերվում աստվածապետությանը, Արեւմուտքի հանդեպ վերաբերմունքը հոռետեսական է: Նրանք չեն հենվի արտաքին ուժերի վրա: Միաժամանակ, նկատեք, որ Իրանի իշխանությունները շատ կոռեկտ են արձագանքում հասարակության մեջ եղած բողոքներին: Ինչպես ասել է Ռոհանին, Իրանի հասարակությունը բողոքելու իրավունք ուն: Այսինքն՝ գոլորշին են բաց թողնում: Նրանք չեն թաքցնում դժգոհությունների առկայությունը: Հույս ունեմ, որ իրանցիները կդիմանան, դա շատ կցանկանայի»,- եզրափակեց Կարինե Գեւորգյանը:
