Իրանը չի կարող հավերժ նստել եւ սպասել Եվրամիության կողմից խոստացված, այսպես կոչված, հատուկ նշանակության մեխանիզմին (Special purpose vehicle, SPV)՝ Իրանի հետ հաշվարկների համար։ Այս մասին հայտարարել է Իրանի ԱԳ փոխնախարար Աբաս Արակչին՝ տեղեկացնում է ԻՌՆԱ-ն։
Նրա խոսքերով՝ չնայած ԱՄՆ-ի ճնշումներին, Եվրոպական միությունը շարունակում է ջանքեր գործադրել Իրանի հետ հաշվարկների ֆինանսական մեխանիզմ ստեղծելու ուղղությամբ։ Արակչին նշել է, որ ԵՄ-ին շատ ժամանակ է հարկավոր հատուկ նշանակության մեխանիզմ ստեղծելու համար, իսկ Իրանը չի կարող հավերժ սպասել։ «Իրանը շարունակում է բանակցությունները Ռուսաստանի, Չինաստանի եւ եվրոպական երկրների հետ, որպեսզի պահպանի միջուկային ծրագրի Համատեղ համընդգրկուն գործողությունների պլանը»,- ասել է Արակչին՝ ընդգծելով, որ Թեհրանը այն դեպքում կշարունակի պահպանել միջուկայի ծրագրին վերաբերող պայմանները, երբ Եվրոպական միությունը ապահովի նրա շահերը։