Մենք ընդհանրապես չպետք է շահարկենք Հայաստան – Արցախ հարաբերությունները: Բոլորիս պարտքն է, այդ թվում՝ ամենքս իր տեղում, մեր միասնականությունը ամրապնդելու՝ Հայաստան-Արցախ-Սփյուռք, և կարևորագույն մարտահրավերների մասին չմոռանալը: Այս մասին «Ազատություն» ռադիոկայանի հետ զրույցում ասել է ԼՂ նախագահի խոսնակ Դավիթ Բաբայանը՝ արձագանքելով նախօրեին վարչապետի պաշտոնակատար Նիկոլ Փաշինյանի հայտարարությանը, որով նա կոչ էր անում Բակո Սահակյանին «կարգի հրավիրել» կառավարության աշխատակիցներին, որպեսզի նա չմեկնաբանի Հայաստանում տեղի ունեցող ներքաղաքական զարգացումները:
«Դա վտանգներն են, որոնք գալիս են Ադրբեջանի կողմից: Եվ երբևիցե չենք փորձել խարխլել մեր հայկական միասնականությունը: Հետևաբար ես կոչ եմ անում հատկապես լրատվամիջոցներին չշահարկել մեր հայկական միասնականությունը․․․ Մեզ համար գերագույն արժեք է մեր հայոց պետականությունը, մեր միասնականությունը»,– ասել է Բաբայանը:
Բաբայանն ընդգծել է է, որ իրավիճակը պետք չի շահարկել, գործընթացները՝ բարդեցնել:
«Կան տարբեր ուժեր, որոնք շահարկում են, չէ՞: Ասենք, մեկը դուրս է գալիս, ինչ-որ բաներ է խոսում՝ լինի դա Արցախում, թե այլ տեղից: Էստեղ մարդիկ կան, որ պղտոր ջրում ուզում են ձկներ որսալ: Թույլ չենք տալու»,– ասել է նա:
Հարցին՝ հնարավո՞ր են արդյոք պաշտոնանկություններ, պաշտոնյաների հրաժարականներ, Բաբայանը պատասխանել է. «Այն բոլոր պաշտոնյաները, ովքեր կխախտեն օրենքը, այն բոլոր պաշտոնյաները, ովքեր իրենց գործունեությամբ խախտում են մեր միասնականությունը և իրենց պրոֆեսիոնալ որակներով չեն համապատասխանի զբաղեցրած պաշտոններին, բնական է, որ նման պաշտոնյաները պիտի դուրս գան, և ուրիշները գան»:
Հարցին, արդյոք Հայաստանից պաշտոնյաներ այցելե՞լ են Լեռնային Ղարաբաղ՝ այս հարցի շուրջ քննարկումներ կազմակերպելու նպատակով, Բաբայանը պատասխանել է. «Հայաստանի Հանրապետությունից այցելում են պաշտոնյաներ, բայց այլ հարցերի շուրջ: Օրինակ, այստեղ է եղել ոստիկանապետը, մենք սպասում ենք, հիմա կլինի հանդիպում Շավարշ Քոչարյանի հետ և այլ պաշտոնյաների․․․ Բայց այն [այցերը] համագործակցության շուրջ է, այցելում են, ինչպես միշտ, Հայաստանի Հանրապետության պաշտոնյաներ․․»։