Բելառուսի մայրաքաղաքում դեկտեմբերի 5-6-ին ԱՊՀ Գործկոմի կենտրոնակայանում նախատեսված է փորձագիտական խմբի նիստը, որի օրակարգում է ընդգրկված կյանքի որակի նորմատիվների նախագծի համաձայնեցումը: Այս մասին հայտնում է Գործկոմի մամուլի ծառայությունը:
Կենտրոնակայանից պարզաբանել են, որ կյանքի նորմատիվները վերաբերում են «ԱՊՀ պետությունների կողմից աջակցվող բավական բարձր մակարդակի ստանդարտներին, որոնք ապահովում են բնակչության պահանջմունքների բավարարումը»:
Ի դեպ, այս նորմատիվները մշակելու խնդիրը նշված է մինչեւ 2020 թվականն ընկած ժամանակահատվածում Համագործակցության տնտեսական զարգացման առաջին փուլի իրականացման միջոցառումների ծրագրում: Նպատակն է պետական երաշխիքների նվազագույն մակարդակի հաստատումը ԱՊՀ երկրների սահմանադրություններով նախատեսված քաղաքացիների սոցիալ-տնտեսական իրավունքների իրականացման ապահովման համար եւ միաժամանակ ուղղվածության որոշումը պետությունների սոցիալ-տնտեսական քաղաքականության իրականացման ու դրա կայուն զարգացման ապահովման համար:
Գործոկոմից հստակեցրել են, որ առաջարկվում է նորմատիվները մշակել այնպիսի ուղղություններում, ինչպիսին են «բնակչության բարեկեցությունը, սոցիալական պաշտպանվածությունը, առողջությունը, կրթությունը, բնակարանային պայմանները, արտադրանքի եւ ծառայությունների որակը, բնապահպանական իրավիճակը, իրավական պաշտպանվածությունը, մշակույթը, ֆիզկուլտուրան եւ սպորտը, տուրիզմը»:
