Ամերիկայի Հայ Դատի հանձնախումբը (ANCA) ափսոսանք է հայտնել, որ Հայաստանում ԱՄՆ դեսպանի պաշտոնի թեկնածու Լին Թրեյսին Հայոց ցեղասպանության մասին հարցերի ժամանակ խուսափողական պատասխաններ է տվել:
«Մենք ափսոսում ենք, որ թեկնածու Թրեյսին Սենատի արտաքին հարաբերությունների կոմիտեի առջեւ իր ելույթում այնքան ջանասիրաբար եւ հրապարակավ չեզոք եւ խուսափողական արտահայտություններ օգտագործեց՝ Հայոց Ցեղասպանության պատշաճ դատապարտումից խուսափելու համար:
Նա, ցավոք, ԱՄՆ վարչակազմի շարքում եւս մեկ զոհ է, որոնք Անկարայի բացահայտ եւ պարտադրող քաղաքականությունը, որով ԱՄՆ-ին արգելում են պատշաճ ձեւով հիշել այդ հանցագործության մասին, մերժելու կամք չունեն», - ասել է Հայ դատի հանձնախմբի գործադիր տնօրեն Արամ Ամբարյանը:
Լսումների ժամանակ Թրեյսին ասել է, որ նա անձամբ ընդունում է Օսմանյան կայսրությունում տեղի ունեցածի եւ 1,5 մլն հայերի սպանության պատմական փաստը:
«Պաշտոնում ընտրվելու դեպքում ես իմ լիազորությունների սահմաններում ամեն ինչ կանեմ կորուստներն ու տառապանքները ճանաչելու համար եւ կմասնակցեմ այդ իրադարձությունների հիշատակին նվիրված բոլոր արարողություններին»,- ասել է նա:
ANCA-ն շնորհակալություն է հայտնել սենատորներ Ռոբերտ Մենենդեսին եւ Էդ Մարկին հայերի շահերին վերաբերող մի շարք հարցերի համար: Մոտ ապագայում ANCA- ն ակնկալում է, որ կոմիտեն գրավոր պատասխանների միջոցով ավելին կիմանա, այն մասին թե ինչպես է Թրեյսին մտադիր ԱՄՆ-ի եւ Հայաստանի միջեւ ամրապնդել քաղաքական, տնտեսական եւ ռազմական հարաբերությունները, ինչպես նաեւ, թե ինչպես է թեկնածուն մտադիր առաջընթացի հասնել առանցքային հարցերում`սկսած ԱՄՆ-ի եւ Հայաստանի միջեւ կրկնակի հարկումից խուսափելու մասին հնացած պայմանագրից: