«Սպառողների իրավունքների պաշտպանության մասին» օրենքը լրացման կարիք ունի: Դեկտեմբերի 5-ին լրագրողների հետ հանդիպման ժամանակ այս մասին ասաց Հայաստանի Սպառողների ազգային ասոցիացիայի նախագահ Մելիտա Հակոբյանը:
Նրա խոսքով՝ օրենքի 23-րդ հոդվածում, որը վերաբերում է գնված արտադրանքի հետվերադարձի հարցին, անհրաժեշտ է լրացում կատարել: «Այսօր շատ խանութներ սպառողներին մերժում են արտադրանքի հետվերադարձը: Մենք առաջարկում ենք լրացում կատարել «Սպառողների իրավունքների պաշտպանության մասին» օրենքում, որի համաձայն՝ խանութներում պետք է փակցված լինի այն ապրանքների ցանկը, որոնք հետվերադարձի ենթակա են, ինչպես նաեւ կառավարության համապատասխան որոշման պատճենը»,- նշեց նա:
Մելիտա Հակոբյանը հավելեց, որ սա, բնականաբար, չի վերաբերի անձնական հիգիենայի ապրանքներին, դեղորայքին եւ մի շարք այլ ապրանքների, եթե դրանք որակյալ են ու ժամկետանց չեն:
