Եվրահանձնաժողովը հրատարակել է եվրոյի գլոբալ դերի ամրապնդման ծրագիր։ Բրյուսելն ուզում է եվրոն ավելի հրապուրիչ դարձնել միջազգային հաշվարկներում եւ ֆինանսական գլոբալ համակարգում, ինչպես նաեւ ընդլայնել եվրոյի օգտագործումը նավթային ու գազային շուկաներում եւ ռազմավարական ոլորտներում, օրինակ՝ ավիաշինության մեջ՝ տեղեկացնում է РБК-ն։

Եվրահանձնաժողովը հրապարակել է եվրոյի ընդլայնման մի քանի ծրագրային փաստաթղթեր։ Աշխատանքային զեկույցում ասվում է, որ այնպիսի ապրանքանիշներ, ինչպիսիք են Brent-ը, WTI-ը, Dubai-ն կամ Urals-ը, հաշվարկվում են դոլարով։ Եվրոյի դիրքը մի քիչ ավելի բարենպաստ է բնական գազի շուկայում։

Այս իրավիճակը կարգավորելու համար Եվրահանձնաժողովը ԵՄ երկրներին խորհուրդ է տալիս էներգակիրների մասին իրենց միջկառավարական համաձայնագրերում օգտագործել եվրոն։

Ֆինանսական շուկայում Եվրահանձնաժողովը առաջարկում է ընդլայնել եվրոարժույթը եւ հասանելի դարձնել այն միջազգային ներդրողների համար։ Բացի այդ, Բրյուսելը ցանկանում է ստեղծել ակնթարթային վճարումների եվրոպական համակարգ, որը կախված չի լինի ԵՄ-ի սահմաններից դուրս գտնվող օպերատորներից։

Եվրահանձնաժողովի ծրագրից հետեւում է, որ պետք է նվազեցնել դոլարից կախվածությունը նաեւ այլ ռազմավարական ոլորտներում, օրինակ՝ տրանսպորտի։ Հանձնաժողովը նշում է, որ ավիաշինության ոլորտում բոլոր հաշիվները ներկայացվում են դոլարով, անգամ եթե խոսքը եվրոպական ավիաարտադրողի, օրինակ՝ Airbus-ի մասին է։

Ըստ ծրագրի եվրոյի դիրքերը պետք է ամրապնդվեն բոլոր կարեւոր ոլորտներում՝ ավիաշինության, նավաշինության, երկաթգծի, մետաղների, հանքային հումքի եւ այլ շուկաներում։