Ֆրանսիան արդեն 2019թ․ հարկերի տակ կդնի թվային ինդուստրիայի միջազգային ընկերություններին, եթե համացանցում գովազդի եվրոպական մակարդակով հարկման շուրջ բանակցությունները արդյունք չտան։ Այդ մասին հայտարարել է Ֆրանսիայի ֆինանսների նախարար Բրյունո Լե Մերը՝ տեղեկացնում է RFI-ն։
«Երեկ մենք ընդհանուր տեսակետի ենք եկել Գերմանիայի փոխկանցլերի հետ, եւ ես հուսով եմ, որ մինչեւ մարտ մենք կմշակենք թվային ինդուստրիայի հարկման համակարգը»,- ասել է ֆրանսիացի նախարարը՝ Եվրամիությանը կոչ անելով «քաջություն ցուցաբերել» եւ դրական կերպով պատասխանել Եվրոպայի քաղաքացիների պահանջներին։ Նա նաեւ հավելել է, որ «եթե եվրոպական մակարդակով բանակցությունները արդյունք չտան, մենք հարկերը ազգային մակարդակով կմտցնենք»։
2018թ․ մարտից Եվրամիության երկրները քննարկում են Եվրահանձնաժողովի ներկայացրած ցուցումները, որոնց համաձայն՝ նախատեսվում է հարկեր սահմանել թվային ինդուստրիայի համաշխարհային խոշոր ընկերությունների (Google, Amazon, Facebook, Apple եւ այլն) ապրանքաշրջանառության վրա։