Առաջիկա ամիսներին, առավելագույնը մեկ տարվա ընթացքում Հայաստանի իշխանությունները պետք է տնտեսական բարեփոխումներ իրականացնեն: Այս մասին դեկտեմբերի 10-ին տեսակամուրջի ժամանակ ասաց Ռուսաստանի գիտությունների ակադեմիայի Արեւելագիտության ինստիտուտի Կովկասագիտության կենտրոնի ավագ գիտաշխատող Անդրեյ Արեշեւը:
Նրա խոսքով, կան նաեւ մեծ թվով արտաքին տնտեսական մարտահրավերներ:
«Դա ոչ միայն Ղարաբաղն է, այլեւ Իրանի հետ հարաբերությունները, որոնց ամրությունը առաջիկայում կփորձարկվի», - կարծում է Արեշեւը:
Խոսելով նախօրեին կայացած արտահերթ ընտրությունների մասին՝ նա նշեց, որ նախորդ ընտրություններում մասնակցության չափազանցված տվյալները հաշվի առնելով, ներկայիս ցուցանիշները վատ չեն:
Հիշեցնենք, որ ԿԸՀ նախնական տվյալներով՝ արտահերթ խորհրդարանական ընտրություններին մասնակցությունը կազմել է 48,63 տոկոս: Հայաստանի Հանրապետական կուսակցությունը ստացել է 4,70 տոկոս ձայն, «Քաղաքացու ընտրություն»-ը՝ 0,68 տոկոս, ՀՅԴ-ն՝ 3,89 տոկոս, «Իմ քայլը»՝ 70,44 տոկոս, «Լուսավոր Հայաստանը»՝ 6,37 տոկոս, «Քրիստոնեա-դեմոկրատական վերածնունդը»՝ 0,51 տոկոս, «Ազգային առաջընթացը»՝ 0,33 տոկոս, «Մենքը»՝ 2,00 տոկոս, «Օրինաց երկիրը»՝ 0,99 տոկոս, «Սասնա ծռերը»՝ 1,82 տոկոս, «Բարգավաճ Հայաստանը»՝ 8,27 տոկոս: