Խորհրդարանում մենք հեղափոխական ընդդիմություն չենք լինի: Այս մասին դեկտեմբերի 10-ին մամուլի ասուլիսում հայտարարեց «Լուսավոր Հայաստան» կուսակցության առաջնորդ Էդմոն Մարուքյանը` ամփոփելով ընտրությունների արդյունքները:
Նրա խոսքով, խորհրդարանում կա միայն մեկ հեղափոխական քաղաքական ուժ:
«Խորհրդարանում միակ հեղափոխական ուժը կլինի ընտրություններում հաղթած քաղաքական թիմը: «Լուսավոր Հայաստանը» ինստիտուցիոնալ, ռեֆորմիստական ուժ կլինի: Մենք մշտական հեղափոխությունների կողմնակից չենք»,- ասաց Մարուքյանը:
Նա նշեց, որ հետհեղափոխական շրջանի ամենակարեւոր խնդիրներից պետք է լինի պառլամենտարիզմի զարգացումը եւ խորհրդարանական վերահսկողության ուժեղացումը:
«Հարկավոր է բարձրացնել ԱԺ-ի ազդեցությունը ուժային կառույցների վրա (Ոստիկանություն, ԱԱԾ), որոնք դեռ Ռոբերտ Քոչարյանի ժամանակ խորհրդարանի վերհսկողությունից դուրս էին հանվել: Բացի այդ կարեւոր է երկրում բարձրացնել խորհրդարանական դիվանագիտության մակարդակը:
Ազգային ժողովը պետք է հստակ դիրքորոշում ունենա այս կամ այն արտաքին քաղաքական հարցերի վերաբերյալ եւ կարողանա այն տեղ հասցնել»,- ասաց նա:
Մարուքյանը նշեց, որ նոր խորհրդարանի կարեւոր առաջնահերթություններից պետք է լինեն հարկային օրենսգրքի բարեփոխումը, մարզերի հավասարաչափ զարգացման ծրագրի մշակումը, ԵԱՀԿ Մինսկի շրջանակում ղարաբաղյան հակամարտության կարգավորումը, հայկական եւ ադրբեջանական ուժերի միջեւ հավասարակշռության վերականգնումը:
Մեկնաբանելով ՀՀԿ-ի եւ ՀՅԴ-ի բավականին բարձր արդյունքները՝ Մարուքյանն ասաց.
«Մենք հարգում ենք բոլոր ընտրողների ձայները եւ կարծքիը, այդ թվում այն ընտրողների, որոնք քվեարկել են ՀՀԿ-ի եւ ՀՅԴ-ի օգտին, եթե այդ ձայները գնված չեն: Անձամբ մենք քարոզարշավի եւ քվեարկության ընթացքում նման խախտումներ չենք արձանագրել»:
Կուսակցության առաջնորդը հավելեց, որ «Լուսավոր Հայաստանը» միշտ կշռադատված որոշումներ է ընդունել, այդ թվում «Ելք» դաշինքից դուրս գալու հարցում:
««Ելքն» ըստ էության դարձավ երեւանյան քաղաքայան ուժ, որը խորհրդարանում հայտնվեց Երեւանի ռեյտինգային թեկնածուների շնորհիվ:
Կուսակցությունից դուրս գալուց հետո մենք ընդլայնեցինք մեր սոցիալական բազան եւ կարողացանք ռեյտինգային թեկնածուների հաշվին ոչ միայն Երեւանում, այլ մարզերում հաջողության հասնել: հաջորդ քայլը պետք է ՏԻՄ ընտրություններում հաղթանակը լինի, ինչպես անեւ քաղաքապետի ընտրություններում»,- ասաց Մարուքյանը:
Նա հավելեց, որ շուտով Փարիզ կմեկնի, որտեղ ԵԽԽՎ-ի մոնիթորինգի հանձնաժողովի նիստը պետք է կայանա եւ դա Ելք դաշինքի կազմում նրա վերջին առաքելությունը կլինի:
Հիշեցնենք, որ դեկտեմբերի 9-ին տեղի ունեցան արտահերթ խորհրդարանական ընտրություններ, որոնց արդյունքում «Լուսավոր Հայաստանը» հայտնվեց երրրորդ տեղում՝ երկրորդ տեղը զիջելով ԲՀԿ-ին: Առաջին տեղում ինչպես սպասելի էր «Իմ քայլը» դաշինքն է:
