ԱՄՆ Մաք-Մերդո անտարկտիկական կայանում դժբախտ դեպքի հետեւանքով երկու աշխատող է զոհվել: Այս մասին հայտարարել են ԱՄՆ Ազգային գիտական հիմնադրամից, որը ղեկավարում է ԱՄՆ անտարկտիկական ծրագիրը, հայտնում է The New York Times-ը:
Աշխատողները դեկտեմբերի 12-ին հրդեհաշիջման համակարգի պլանային տեխնիկական սպասարկում են կատարել գեներատորի շենքում, որը տեղակայված է Մաք-Մերդոյից մոտ 100 կմ հեռավորությամբ գտնվող Նյուուոլ լեռան վրա: Ուղղաթիռի օդաչուն, որը աշխատողներին լեռ է հասցրել, նրանց գտել է անգիտակից վիճակում, երբ նրանք նշանակված ժամին չեն վերադարձել:
Աշխատողները պառկած էին շենքի հատակին: Նրանցից մեկը մահացել էր տեղում, երկրորդը Մաք-Մերդոյի հիվանդանոցում: Առայժմ հայտնի չէ, թե որն է նրանց մահվան պատճառը: