Ֆրանսիայի մայրաքաղաքային շրջանում «դեղին բաճկոնավորների» շաբաթօրյա ցույցերի ժամանակ ձերբակալվածների թիվը 50-ից անցել է, հայտնում են ֆրանսիական լրատվամիջոցները՝ փոխանցելով ոստիկանության տվյալները:
Ֆրանսիայում «Դեղին բաճկոններ» շարժման բողոքի ցույցերը սկսվել են նոյեմբերի 17-ին, նրանք մասնավորապես հանդես են գալիս բենզինի գների բարձրացման դեմ: Զանգվածային ցույցերն ուղեկցվում են ոստիկանների եւ ցուցարարների բախումներով, ջարդարարությամբ ու մեքենաների հրկիզումներով, խանութների, բանկերի ավերմամբ:
20 minutes-ը հայտնում է, որ Փարիզի ժամանակով 10.30-ի դրությամբ Իլ դե Ֆրանս շրջանում ձերբակալվել է 52 մարդ, այդ թվում՝ 15-ը կայարաններում եւ ճանապարհային հսկիչ կետերում «նախնական ստուգումների» ժամանակ:
France Info ռադիոկայանի տեղեկություններով՝ Իլ դե Ֆրանս շրջանում ձերբակալվածների թիվը հասել է 58 մարդու:
BFMTV-ն տեղեկացնում է, որ Փարիզի ժամանակով 11.00-ին (Երեւանի ժամանակով 14.00) ամբողջ Ֆրանսիայում ցույցերին մասնակցել է մոտ 2 հազար մարդ: Մայրաքաղաքում Ելիսեյան դաշտերում եւ Օպերայի հրապարակում ընթացող ցույցերին մասնակցում է մոտ 1000 մարդ: