Շաբաթ գիշերը՝ դեկտեմբերի 15-ին, Բուդապեշտում վերականգնվել են նոր Աշխատանքային օրենսգրքի դեմ բողոքի ցույցերը, որով թույլ է տրվում արտաժամյա աշխատանքային ժամերի կտրուկ բարձրացում, ինչպես նաեւ երկրի վարչապետ Վիկտոր Օրբանի քաղաքականության դեմ, փոխանցում է «Գերմանական ալիքը»:
Հունգարիայի մայրաքաղաքի փողոցներ է դուրս եկել մի քանի հազար մարդ, որոնք հավաքվել են խորհրդարանի շենքի մոտ: Ցուցարարներից ոմանք ոստիկանների վրա շշեր, ծխանռնակներ եւ այլ առարկաներ են նետել: Ի պատասխան՝ ոստիկաններն արցունքաբեր գազ են կիրառել:
Դիտորդները նշում են, որ այս ցույցն առավել խաղաղ էր, քան նախորդները: Բողոքի ցույցերը բռնկվել են դեկտեմբերի 12-ին Հունգարիայում օրենք ընդունելուց հետո, որով արտաժամյա աշխատանքի թույատրելի ժամերը տարեկան մեծացվում են 250-ից մինչեւ 400 ժամ: Պրոֆմիություններն այն «ստրկացման օրենք» են անվանում:
Դժգոհությունն ուղղված է նաեւ Հունգարիայի կառավարության աջազգայնական քաղաքականության դեմ, ինչպես նաեւ բուհերի մասին սահմանափակող օրենքի դեմ, ինչի հետեւանքով երկրից ստիպված էր հեռանալ լիբերալ Կենտրոնական-Եվրոպական համալսարանը, որը հիմնադրվել եւ ֆինանսավորվում էր հունգարական ծագում ունեցող ամերիկացի միլիարդատեր Ջորջ Սորոսի կողմից:
Այս շաբաթ Հունգարիայի մայրաքաղաքում հակակառավարական ցույցերի ժամանակ ընդհանուր ձերբակալվել է ավելի քան 50 մարդ:
