Արցախի անվտանգության եւ կարգավիճակի հասկացություններն անքակտելիորեն կապված են: Դեկտեմբերի 20-ին ճեպազրույցում այս մասին ասաց ԱԳՆ մամուլի քարտուղար Աննա Նաղդալյանը:
Ի պատասխան հարցին՝ Մադրիդյան սկզբունքներն արդյոք մնո՞ւմ են օրակարգում, Աննա Նաղդալյանը հիշեցրեց, որ Հայաստանի դիրքորոշման համաձայն՝ բանակցությունները պետք է շարունակվեն ԵԱՀԿ Մինսկի խմբի շրջանակում, բացառապես խաղաղ ճանապարհով, իսկ առաջնահերթությունը Արցախի անվտանգությունն ու կարգավիճակն են, ինչպես նաեւ երկարաժամկետ խաղաղության հաստատման մեջ Արցախի վճռորոշ ձայնը: «ԱԳ նախարարները պայմանավորվել են պահպանել հանդիպումների դինամիկան, եւ բոլոր հանդիպումներից հետո մենք հստակ ներկայացրել ենք արդյունքներն ու պայմանավորվածությունները»,- նշեց ԱԳՆ մամուլի քարտուղարը:
Պատասխանելով այն հստակեցնող հարցին, թե կարգավիճակը կարելի է տարբեր կերպ հասկանալ, եւ ասվածից արդյոք հետեւո՞ւմ է, որ ինքնորոշման իրավունքը երկրորդ պլան է մղվել, Աննա Նաղդալյանը շեշտեց, որ չի կարող որեւէ բան լինել, որը կսպառնա Արցախի ժողովրդի ֆիզիկական անվտանգությանը: «Իսկ ի՞նչ է կարգավիճակը, եթե ոչ իրավունքի իրացում եւ լիարժեք անվտանգություն»,- նշեց ԱԳՆ մամուլի քարտուղարը:
Մեկնաբանելով հայկական լրատվամիջոցներում իրարանցում առաջացրած Միլանում հանդիպման արդյունքների վերաբերյալ Ադրբեջանի ԱԳ նախարարի հայտարարությունը՝ Աննա Նաղդալյանը հիշեցրեց, որ այն ամենը, ինչի մասին Մամեդյարովը հայտարարել է դեկտեմբերի 19-ին, Զոհրաբ Մնացականյանն ասել է դեռեւս դեկտեմբերի 6-ին՝ հանդիպումից հետո. խոսքը վերաբերել է հանդիպումների դինամիկայի շարունակման մասին փոխըմբռնման հասնելուն եւ հնգակողմ հայտարարության տեքստի համաձայնեցմանը:
ԱԳՆ մամուլի քարտուղարը հիշեցրեց, որ Հայաստանում բազմիցս են խոսել բանակցությունների առաջմղման համար մթնոլորտի ստեղծման անհրաժեշտության մասին: Ինչպես նաեւ պայմանավորվածությունների կատարման, ռազմատենչ հայտարարություններից հրաժարվելու անհրաժեշտության մասին: Լավ է, որ Ադրբեջանից առաջին անգամ նման մի բան հնչեց, հավելեց Նաղդալյանը:
Ինչ վերաբերում է Ղազախի եւ Աղստեւի տեղամասերում բանակային ստորաբաժանումները սահմանապահ ուժերով փոխարինելու Ադրբեջանի իշխանությունների որոշմանը, ապա ԱԳՆ-ում կարծում են, որ առայժմ վաղ է գնահատական տալ:
