Ավստրալիայի իրավապահ մարմինները տղամարդու են ձերբակալել, ում կասկածում են Ավստրալիայում մի շարք երկրների դեսպանատներ ու հյուպատոսություններ կասկածելի փաթեթներ ուղարկելու մեջ, նշված է մամուլի հաղորդագրության մեջ, որը հրապարակվել է երկրի դաշնային ոստիկանության պաշտոնական կայքում, փոխանցում է «ՌԻԱ Նովոստի»-ն:
Ոստիկանության տեղեկություններով՝ կասկածյալը, որը Շեփարթոնից (Վիկտորիա նահանգ) 48-ամյա տղամարդ է, ձերբակալվել է իր տանը փոստով վտանգավոր ծանրոցներ ուղարկելու կասկածանքով:
Հաղորդվում է, որ նա դատարանի առջեւ կկանգնի հունվարի 10-ին Մելբուռնում: Ենթադրաբար, տղամարդն ուղարկել է 38 կասկածելի փաթեթներ Մելբուռնում, Կանբերայում եւ Սիդնեյում գտնվող մի շարք երկրների դեսպանատներ ու հյուպատոսություններ: Եթե նրա մեղքը հաստատվի, նրան կարող է սպառնալ մինչեւ 10 տարվա ազատազրկում:
Ոստիկանությունից տեղեկացրել են, որ կասկկածելի փաթեթների պարունակությունը կստուգվի դատական փորձաքննությամբ: Նշվում է, որ ներկայումս հանրային կարգին սպառնալիքներ չկան:
Ավելի վաղ Ավստրալիայի ոստիկանությունը հայտնել էր, որ քննում է կասկածելի փաթեթների հետ կապված իրավիճակը, որոնք ուղարկվել էին Կանբերայում եւ Մելբուռնում գտնվող հյուպատոսություններ եւ դեսպանատներ: Լրատվամիջոցների տեղեկություններով՝ փաթեթները կարող էին գտնել 13 երկրների ներկայացուցչություններում, որոնց թվում են Մեծ Բրիտանիան, Գերմանիան, Իտալիան, Շվեյցարիան, Պակիստանը, Հունաստանը, Ինդոնեզիան, ԱՄՆ-ն, Ֆրանսիան, Հարավային Կորենա, Հնդկաստանը: Նվազագույնը 6 հյուպատոսարանի աշխատակիցներին տարհանել էին: