«Իմ քայլը» դաշինքը շատ մեծ խմբակցություն ունի: Եվ իսկապես սրա հետ կապված կարող են առաջանալ որոշակի դժվարություններ: Հունվարի 10-ին 7-րդ գումարման Ազգային ժողովի պատգամավորներին մանդատների հանձնման հանդիսավոր արարողությունից հետո լրագրողների հետ զրույցում այս մասին ասաց նորընտիր պատգամավոր Լիլիթ Մակունցը, որը, լուծարված Մշակույթի նախարարության ղեկավարի պաշտոնակատարի պաշտոնը լքելով, կղեկավարի խորհրդարանական մեծամասնությունը:
Ընդ որում՝ նա հավաստիացրեց, որ բոլոր խնդիրները լուծելի են: «Իսկ ինչ վերաբերում է նորընտիր պատգամավորների փորձ չունենալուն, ապա ցուցանիշները կարող են տարբեր լինել: Եթե խոսքն այն մասին է, որ շատերը խորհրդարանում են հայտնվել առաջին անգամ, ապա այո, այդ իմաստով նրանք առաջինն են, եւ ես կարծում եմ, որ Հայաստանի քաղաքացիները քվեարկության եւ ընտրություններին մասնակցելու ճանապարհով նրանց՝ մարդկանց, որոնք դեռեւս փորձ չունեն, հանձնարարել են իրենց գործունեությունը ծավալել Ազգային ժողովում: Ինչ վերաբերում է մասնագիտական որակներին, ապա այդպիսի խնդիր չկա, քանի որ բոլորը տարբեր ոլորտներում աշխատելու բավականին հարուստ փորձ ունեն, ինչպես իրավաբանական դաշտում, այնպես էլ միջազգային հարաբերությունների հարցում եւ այլն»,- ասաց Մակունցը:
