Արպես ԱԺ ապագա նախագահ, եթե ընտրվեք, արդյոք պատրա՞ստ եք սուպերվարչապետական համակարգը փոխելուն միտված քայլեր անելու, մեր քայլերին աջակցելու եւ երկիրը իրական խորհրդարանական կառավարման հունի մեջ գցելու համար: Այս մասին, այսօր՝ հունվարի 14-ին, դիմելով ԱԺ նախագահի թեկնածու Արարատ Միրզոյանին հարց հնչեցրեց «Լուսավոր Հայաստան» խմբակցության ղեկավար Էդմոն Մարուքյանը:
Ի պատասխան Արարատ Միրզոյանն ասաց. «Մենք բազմիցս քննարկել ենք այս հարցը եւ մեր դժգոհությունն ենք հայտնել որոշ կարգավորումների վերաբերյալ: Մենք բաց ենք քննարկումների համար, անշուշտ մենք ելնում ենք նաեւ այն հանգամանքից, որ շատ բաներ անձերով են պայմանավորված: Այն անձինք, որոնք ի չարս կարող էին օգտագործել նախկինում, այժմ ի բարօրություն կարող է օգտագործվել: Բայց իհարկե, չպետք է բավարարվենք անձերի առկայությամբ եւ պետք է ստեղծենք իրավական կարգավորումներ: Մենք խոսել ենք նաեւ Ոոստիկանության, ՊԵԿ-ի ԱԺ գալու եւ հաշվետու լինելու մասին: Առաջիկա օրերին կխոսենք այս մասին»:
Նա անդրադարձավ նաեւ նախկին ԱԺ-ում ստեղծված գաղտնալսման հարցով եւ գազի սակագների հարցով հաշվիչ հանձնաժողովների ճակատագրին. «Գաղտնալսման հարցով հաշվիչ հանձնաժողովի հետ կապված վերապահումներ կան, որից պետք է ծանութեթեւ անենք, գուցե արժի վերստեղծել: Իսկ գազի հարցով հաշվիչ հանձնաժողով նույնպես կարելի է նորից ստեղծել: Առաջիկայում առիթներ կլինեն նոր հաշվիչ հանձնաժողովներ ստեղծելու»:
Էդմոն Մարուքյանն արձագանքեց. «Մենք կողմ ենք ինստիտուցիոնալ լուծումների, եւ չպետք է սպասենք բարի կամ չար թագավոր ունենալուն: Մենք պետք է գնանք ինստիտուցիոնալ լուծումների ճանապարհով»: