Ազգային ժողովը շարունակում է նախօրեին սկսված իր անդրանիկ նստաշրջանը: Նշենք, որ երեկ խորհրդարանը հասցրեց ընտրել ԱԺ նախագահ. Այդ պաշտոնում միաձայն ընտրվեց Արարատ Միրզոյանը: իսկ ահա ԱԺ փոխնախագահների ընտրության հարցի քննարկումը կիսատ մնաց եւ շարունակվում է այսօր:

Մասնավորապես, ԱԺ նախագահ փոխնախագահներ են առաջադրվեցին «Իմ քայլը» դաշինքից Լենա Նազարյանն ու Ալեն Սիմոնյանը, իսկ ԱԺ ընդդիմադիր փոխխոսնակի տեղի համար առաջադրվել են երկու թեկնածուներ՝ Վահե Էնֆիաջյանը ԲՀԿ-ից եւ Մանե Թանդիլյանը՝ «Լուսավոր Հայաստան» կուսակցությունից:

Իշխող «Իմ քայլը» խմբակցությունը որոշել է, որ քվեարկելու է ԲՀԿ թեկնածուի օգտին, քանի որ ԲՀԿ-ն ավելի մեծ խմբակցություն ունի:

Նշենք, որ ԱԺ անդրանիկ նստաշրջանի օրակարգում են նաեւ ԱԺ մշտական հանձնաժողովների ստեղծումը, մշտական հանձնաժողովների նախագահների ընտրությունները, Կառավարության ծրագրին հավանություն տալու հարցը, ինչպես նաեւ Կառավարության կառուցվածքի փոփոխության վերաբերյալ օրենքի նախագծի քննարկումը, որով նախատեսվում է կրճատել նախարարությունների թիվը՝ 17-ից դարձնելով 12:

Հիշեցնենք, որ ԱԺ առաջին նստաշրջանն ավարտվում է Ազգային ժողովի նախագահի եզրափակիչ ելույթով եւ հերթական նստաշրջանի գումարման օրվա մասին հայտարարությամբ:

Այս խորհրդարանն ունի 132 պատգամավոր եւ երեք խմբակցություն, իսկ նախորդ ԱԺ-ն ուներ 105 պատգամավոր եւ 4 խմբակցություն: «Իմ քայլը» դաշինքն ունի 88 պատգամավոր, ԲՀԿ-ն՝ 26 եւ «Լուսավոր Հայաստանը»՝ 18 պատգամավոր:

Սահմանադրության 149-րդ հոդվածի համաձայն Ազգային ժողովը վարչապետ չի ընտրելու, այլ «ՀՀ նախագահը խորհրդարանի ձեւավորումից անմիջապես հետո անհապաղ վարչապետ է նշանակում խորհրդարանական մեծամասնության ներկայացրած թեկնածուին», իսկ կառավարությունը կազմավորվում է վարչապետի նշանակումից  հետո 15-օրյա ժամկետում: