![](img/news/49/09/71/default.jpg)
Հայաստանի Պետական եկամուտների կոմիտեի նախագահը խոստովանեց մաքսային ընթացակարգերի խախտման դեմ պայքարի անարդյունավետությունը: Հունվարի 16-ին մամուլի ասուլիսի ժամանակ նա, մասնավորապես, նշեց, որ մաքսային ծառայությունները բախվել են մինչեւ 50 կգ քաշով ապրանքներն առանց մաքսատուրքի ներմուծելու հնարավորության մասին որոշման հետ կապված խնդիրների:
«Մաքսատան աշխատակիցներն ու սահմանապահները իրենց սպառնալիքի տակ են զգում, երբ Բագրատաշենում 300 մարդուց կազմված խմբերը 50-ական կգ ապրանքներով բեռնված սայլերով տառացիորեն գրոհում են մաքսակետը»,- ասաց Անանյանը:
Նա նշեց, որ ՊԵԿ-ն Ազգային անվտանգության ծառայության սահմանապահ զորքերի հետ համատեղ փաստացի չի կարողացել կանխել 50-ական կգ խմբաքանակներով երկիր ապրանքների ներմուծմամբ բիզնեսը:
«Անմաքս ներմուծման չափի մեծացման որոշում ընդունելով՝ ՊԵԿ-ը չէր կարող պատկերացնել, որ 50 կգ-ը «բիզնես» կդառնա եւ կխոչընդոտի իրական ձեռնարկատիրությանը: Ընդ որում՝ մենք խիստ միջոցներ չենք կիրառել, որպեսզի իրավիճակը կտրուկ չսրենք»,- ասաց Անանյանը:
Նա հավելեց, որ ամանորյա տոներին ընդառաջ ՊԵԿ-ի դրական որոշումը սպառնալիք է ստեղծել իրական բիզնեսի համար, գնանկումը բիզնեսին վնաս է հասցրել չվճարված հարկերի հաշվին:
Անանյանը չբացառեց անմաքս ներմուծման լիմիտի նվազեցման հնարավորությունը, բայց չնշեց՝ որքանով: