Քաղաքացիներին հետաքրքրում են Ադրբեջանի նախագահ Իլհամ Ալիեւի հետ հանդիպման բոլոր մանրամասները, բայց բոլորի բացահայտումը բարոյական չէ: Հունվարի 25-ին Մոսկվայում ԵՏՀ կենտրոնակայանում մամուլի ասուլիսի ժամանակ այս մասին հայտարարել է Հայաստանի վարչապետ Նիկոլ Փաշինյանը:
Նրա հավաստիացմամբ՝ բանակցությունների կոնկրետ արդյունքներ, ըստ էության, չկան, քանի որ դա «ուղղակի շփում» էր, իսկ Դուշանբեում կոնկրետ արդյունքներ էին ձեռք բերվել: «Ո՛չ Ալիեւը, ո՛չ ես, ո՛չ որեւէ մեկ ուրիշը արդյունքներ չենք ակնկալել: Իհարկե, խոսել ենք ղարաբաղյան հակամարտության մասին: Փաստացի, դա բանակցություն չէր, այլ ոչ պաշտոնական շփում»,- ասել է Փաշինյանը:
Հայաստանի վարչապետը նշել է, որ Հայաստանի եւ Ադրբեջանի ղեկավարները խոսել են հիմնահարցի իրենց տեսլականի եւ այն մասին, թե 2 երկրների ժողովուրդներն ինչպես են ընկալում այս հարցերը:
Նիկոլ Փաշինյանը, միաժամանակ, ընդգծել է, որ Իլհամ Ալիեւի հետ խոսել է միայն Հայաստանի անունից: «Ես բազմիցս ասել եմ, որ կարող եմ ներկայացնել Հայաստանը, բայց ոչ Լեռնային Ղարաբաղի Հանրապետությունը, որովհետեւ Ղարաբաղի բնակիչներն ինձ չեն ընտրել, նրանք իրենց նախագահին են ընտրում եւ իրենց կառավարությանը»,- եզրափակել է Հայաստանի վարչապետը:
