ԱՄՆ-ը կթուլացնի պատժամիջոցները Վենեսուելայի PDVSA պետական նավթագազային ընկերության դեմ, եթե ընկերության վերահսկողությունն անցնի իրեն նախագահ հռչակած Խուան Գուայդոյին, ասվում է ամերիկյան ֆինանսների նախարարության օտարերկրյա ակտիվների վերահսկման (OFAC) վարչության մեկնաբանությունում, տեղեկացնում է ՌԲԿ-ն։

«PDVSA-ի եւ նրա դուստր ընկերությունների դեմ պատժամիջոցների թուլացման ճանապարհը ընկերության վերահսկման հանձնումն է ժամանակավոր նախագահ Խուան Գուայդոյին կամ դեմոկրատական ճանապարհով ընտրված կառավարությանը»,- ասել է OFAC-ը՝ նշելով, որ դրա համար Վենեսուելայի իշխանությունները պետք է կոռուպցիայի դեմ պայքարի, դեմոկրատիայի վերականգնման միջոցներ ձեռնարկեն, ինչպես նաեւ հարգեն մարդու իրավունքները։

ԱՄՆ ֆինանսների նախարարությունում կարծում են, որ ընկերության վերահսկողության հանձնումը թույլ կտա պահպանել PDVSA ակտիվները երկրի բնակիչների համար եւ թույլ չի տա պետության գործող ղեկավար Նիկոլաս Մադուրոյին չարաշահել դրանք։ OFAC-ը նրան անվանել է «նախկին նախագահ»։