Ապրիլյան պատերազմից հետո Ալաշան տեղափոխված թալիշցիները լիահույս են, որ այս տարվա երկրորդ կեսին կվերադառնան իրենց գյուղ։
NEWS.am-ի հետ զրույցում Թալիշի գյուղապետ Յուրա Պետրոսյանը հայտնեց, որ ներկայումս Թալիշում 8 նոր տուն է կառուցվում, եւ ամենայն հավանականությամբ, ամռանն արդեն կվերադառնան այնտեղ։
«Այս ուսումնական տարին ավարտվի, ամենայն հավանականությամբ, կտեղափոխվենք, ամեն դեպքում նման ծրագիր կա։ Հույս ունենք, որ նոր ուսումնական տարին արդեն Թալիշում կսկսենք»,- ասաց գյուղապետը։
Ալաշանում այժմ 51 ընտանիք է ապրում, Յուրա Պետրոսյանի խոսքով, այստեղ որեւէ շինարարություն չի կատարվում, քանի որ բոլորն էլ գիտեն՝ Ալաշանն իրենց մշտական բնակության վայրը չէ․ «Թալիշցիներն այս պահին զբաղվածության խնդիր մեծ հաշվով չունեն, մարդիկ աշխատում են, մի մասը Ալաշանում մեղվաբուծությամբ է զբաղվում կամ հող է մշակում»։
Հիշեցնենք, որ թալիշցիները գյուղից հեռացել էին ապրիլյան պատերազմի օրերին։ Արդեն շուրջ 3 տարի մարդկանց մի մասն Ալաշանում է բնակվում, մյուսներն Արցախի ու Հայաստանի տարբեր համայնքներում։