Հայաստանում «թավշյա հեղափոխության» ժամանակահատվածում տեղի ունեցած ամենագլխավորը, ամենալավը եւ գեղեցիկը այն էր, որ անցավ Սահմանադրությանը համապատասխան եւ դրա շրջանակում: Փետրվարի 6-ին լրագրողների հետ հանդիպման ժամանակ այս մասին ասաց Հայաստանում Իտալիայի արտակարգ եւ լիազոր դեսպան Վինչենցո Դել Մոնակոն:
Նրա խոսքով՝ այդ ժամանակահատվածում ոչ մի վատ բան տեղի չի ունեցել, ամեն ինչ առանց բռնության է անցել: «Եվ դեսպանատան պատուհանից տեսնելով, թե ինչպես է այդ բազմությունը, որը հիմնականում երիտասարդներից էր կազմված, ինչ-որ տեղ գնում, ես հասկանում էի, որ խոսքը ազգային զարթոնքի մասին է: Այն, ինչ Հայաստանում տեղի ունեցավ, ցանկացած բիզնեսմենի համար խթան է»,- ասաց դեսպանը՝ հավելելով, որ իտալացի բիզնեսմենները Հայաստանը որպես շուկա են դիտարկում, որտեղ կկարողանան իրենց արտադրանքը ներկայացնել եւ իրացնել, եւ չեն պատրաստվում քաղաքականությամբ զբաղվել:
Ընդ որում՝ նա հայտնեց, որ Հայաստանում նախատեսված է ապրիլին խեցու արտադրության ֆաբրիկա բացել, որտեղ կներդրվեն արտադրության ամենաժամանակակից եվրոպական տեխնոլոգիաներ, ինչպես նաեւ չափորոշիչներ:
Դիվանագետը նշեց, որ դրանից բացի, իտալացի ձեռնարկատերերը Հայաստանը դիտարկում են որպես ԵՏՄ անդամ երկրներից մեկը: «Նրանք ուսումնասիրում են, թե այստեղ բիզնեսի համար ինչպիսի պայմաններ են ստեղծված, իրենց աշխատելու համար արդյոք բարենպա՞ստ են»,- ասաց Վինչենցո Դել Մոնակոն:
