Հռոմի իշխանությունները ցանկանում են կազմել արտասահմանցի զբոսաշրջիկների սեւ ցուցակ, որպեսզի արգելեն նրանց երկրորդ այցելությունը քաղաք, տեղեկացնում է ՌԻԱ «Նովոստի»-ն՝ հղում կատարելով АТОР-ին։
Հռոմում չեն ցանկանում, որպեսզի մոլի զբոսաշրջիկները նորից գան քաղաք, որոնց պահվածքը խախտում է սոցիալական նորմերը եւ սպառնում վնասել տեսարժան վայրերը։ Ինչպես գրում են իտալական լրատվամիջոցները, Հռոմի քաղաքապետ Վիրջինիա Ռաջին դիմել է օտարերկրյա պետությունների դեսպանություններին՝ օգնելու կազմել անցանկալի այցելուների ցուցակը, որոնց վերադարձը քաղաքում չեն ցանկանում։
Նախնական տվյալներով՝ կախված զբոսաշրջիկների արարքների ծանրությունից, նրանց կարգելեն ինչ-որ ժամանակով գալ Հռոմ։ Թե ինչպես կկատարվի դա տեխնիկապես եւ որքան ժամանակի համար կգործի սահմանափակումը՝ առայժմ չի ճշտվում։ Այս գաղափարի իրականացման կոնկրետ եղանակները գործնականում քաղաքապետուհին կքննարկի Իտալիայի ներքին գործերի նախարար Մաթեո Սալվանիի հետ հանդիպման ժամանակ։
Մամուլի տվյալներով՝ նման քայլի դիմել Հռոմի քաղաքապետին մղել է ռուս զբոսաշրջիկների վերջերս կատարած արարքը Բարկաչա շատրվանի մոտ՝ Իսպանիայի հրապարակում։ Միջադեպը տեղի է ունեցել փետրվարի 10-ին, երբ ճանապարհային ոստիկանությունը նկատել էր երկու կանանց՝ 35-40 տարեկան, ովքեր թռչում էին XVII դարի շատրվանը ցանկապատող պատնեշների վրայով։ Զբոսաշրջիկները չեն ենթարկվել ոստիկանության պահանջներին՝ հեռանալ շատրվանից եւ սկսել են պարել նրա եզրերին։ Ավելին, հետագայում նրանք դիմադրություն են ցուցաբերել ոստիկանությանն ու ձերբակալվել են։