Ադրբեջանական կողմը սպասում է մեր թուլանալուն: Այս մասին փետրվարի 18-ին լրագրողների հետ հանդիպման ժամանակ ասաց ղարաբաղյան պատերազմի մասնակից, նախկին հետախույզ Վովա Վարդանովը:
Վարդանովի խոսքով՝ հակառակորդի հանդարտությունը պայմանավորված է նրանով, որ հայկական կողմը դեռեւս բավականաչափ չի թուլացել, ուստի համոզված չէ, որ կարող է նրան հաղթահարել: «Մեզ համար ամենակարեւոր խնդիրներից մեկը հասարակության անպատրաստվածությունն է, ինչպես նաեւ մեր ներքին մասնատումը՝ «լեւոնականների», «քոչարյանականների» եւ «սերժականների»: Խաղաղությանն ինչ նախապատրաստելու մասին կարող է խոսք լինել, եթե մեր քաղաքացիները շարունակում են ամեն ինչ անել իրենց որդիներին բանակում ծառայելուց ազատելու համար»,- նշեց նախկին հետախույզը:
Անդրադառնալով Սիրիա հայկական զորակազմ ուղարկելուն՝ Վովա Վարդանովը շեշտեց, որ այս որոշմանն աջակցում է, քանի որ հայկական պետությունը պետք է օգնի հայերին՝ անկախ այն հանգամանքից, թե նրանք որտեղ են գտնվում: «Մենք չպետք է Սփյուռքին նայենք միայն որպես ֆինանսների աղբյուրի: Հայաստանը նրանց պաշտպանելու պարտավորություն ունի: Ավելին՝ կարծում եմ, որ Սիրիա պետք է ուղարկել նաեւ ռազմական ստորաբաժանում»,- եզրափակեց նա:
