Իրանի անվտանգության աշխատակիցները ահաբեկչության կազմակերպման կասկածանքով ձերբակալել են 8 մարդու: Ահաբեկչության հետեւանքով Սիստան եւ Բելուջիստան նահանգում զոհվել էին ԻՀՊԿ-ի աշխատակիցները, հայտնում է Tasnim- ը:
Սիստան եւ Բելուջիստան նահանգի Արդարադատության դեպարտամենտի ղեկավար Էբրագիմ Համիդին ասել է, որ ոստիկանությունը եւ իրավապահները արդեն կալանավորել են 8 կասկածյալների:
Ըստ պաշտոնյայի՝ կալանավորվածների թվում կին կա, որը ահաբեկչության ժամանակ օգտագործված մեքենայի սեփականատերն է:
Հիշեցնենք, որ փետրվարի 13-ին մահապարտ ահաբեկիչը հարվածել էր ԻՀՊԿ-ի անձնակազմին տեղափոխող ավտոբուսին, ինչի հետեւանքով զոհվել էր 27 մարդ, եւս 13-ը վիրավորվել էր: Հարձակման պատասխանատվությունը ստանձնել էր Պակիստանում գործող «Ջայշ ուլ-Ադլ» ահաբեկչական խմբավորումը: