Առկա է երեք ուղղիչ հաստատությունների տեղափոխման անհրաժեշտություն: Դրանք են «Գորիս», «Նուբարաշեն» եւ «Երեւան-Կենտրոն» ՔԿՀ-ները: Այս մասին փետրվարի 22-ին Մարդու իրավունքների եւ հանրային հարցերով խորհրդարանական մշտական հանձնաժողովի նիստում ասաց Հայաստանի արդարադատության նախարար Արտակ Զեյնալյանը:
Այսպես, նրա խոսքով, «Գորիս» ՔԿՀ-ի փոխարեն պետք է կառուցվի նոր ՔԿՀ, որի համար արդեն տեղ է հատկացված եւ համապատասխան նախագիծ է պատրաստված: Ընդ որում՝ նախատեսվում է «Նուբարաշենը» վերանորոգել, «Երեւան-Կենտրոնը» տեղափոխել:
Հանձնաժողովի նախագահ, «Բարգավաճ Հայաստան» կուսակցությունից պատգամավոր Նաիրա Զոհրաբյանը հետաքրքրվեց՝ եթե «Նուբարաշեն» ՔԿՀ-ն ցանկանում են փակել, ինչի մասին բազմիցս հայտարարել են տարբեր մակարդակի պաշտոնյաներ, ապա այդ դեպքում ինչո՞ւ են ուզում այն վերանորոգել: «Պետական բյուջեով հատկացվել է 280 մլն դրամ, որը հատկացվել է ոչ միան «Նուբարաշեն» ՔԿՀ-ի վերակառուցման, այլեւ «Սեւան» ՔԿՀ-ի համար: Այս գումարը նախատեսված է արտաքին պատերի նորոգման, դրենաժի, մի շարք հաստատությունների էլեկտրական համակարգի վերանորոգման համար: Վերանորոգման աշխատանքներն անհրաժեշտ են, քանի որ եթե մենք միջոցներ ստանանք, «Նուբարաշենն իր գործունեությունը մի քանի տարով կերկարացնի, եւ մենք չենք ցանկանում դատապարտյալներին պահել ներկայիս պայմաններում»,- պարզաբանեց Զեյնալյանը՝ պատասխանելով Նաիրա Զոհրաբյանի հարցին:
Հիշեցնենք, որ «Նուբարաշեն» ՔԿՀ-ն փակելու մասին հայտարարել էր վարչապետ Նիկոլ Փաշինյանը: