Իրանին հետաքրքրում են Հայաստանի հետընտրական զարգացումները: Փետրվարի 25-ին լրագրողների հետ հանդիպման ժամանակ այս մասին ասաց արտակարգ եւ լիազոր դեսպան, փորձագետ Արման Նավասարդյանը:
Նրա խոսքով՝ նրանց, մասնավորապես, հետաքրքրում է Հայաստանի դիրքորոշումը ամերիկյան պատժամիջոցների նկատմամբ:
«Արտաքին քաղաքականության վեկտորների հանդեպ մոտեցումները չեն փոխվել նաեւ Ջոն Բոլթոնի այցից հետո, այդ թվում՝ Իրանի հարցում: Ամերիկացիները մեր հարաբերություններին չեզոք են վերաբերվում՝ հաշվի առնելով Հայաստանի իրավիճակի առանձնահատկությունները, սակայն ամեն ինչ կարող է փոխվել»,- պարզաբանեց Նավասարդյանը:
Նա հայտարարեց, որ իրանցիները դժգոհ են մեր երկրների միջեւ ռազմա-քաղաքական, տնտեսական եւ այլ ոլորտների ներկայիս հարաբերություններից:
«Նրանք դժգոհ են «Հյուսիս-Հարավ» ավտոճանապարհի կառուցման դանդաղ ընթացքից, ինչպես նաեւ նրանից, որ որոշ հատվածներ չեն շահագործվում: Մայրուղու Արտաշատ-Մեղրի հատվածում ոչ մի բան չի արվել: Ճանապարհի կառուցումը կարեւոր է, որպեսզի երկրում տնտեսական բում ստեղծվի»,- նշեց նա:
Նավասարդյանը հավելեց, որ կարեւոր է, որպեսզի Հայաստանը կարողանա դառնալ Իրանի եւ ԱՄՆ-ի միջեւ կապող օղակ, ինչպես նաեւ Իրանի եւ ԵՏՄ շուկայի միջեւ:
«Դրանից բացի, Հայաստանի, Իրանի եւ ԵՄ-ի միջեւ եռակողմ հարաբերությունների զարգացման հնարավորություն կա, մասնավորապես՝ բանկային ոլորտում»,- հայտարարեց նա:
Նավասարդյանը շեշտեց, որ տարածաշրջանի մյուս երկրների եւ Իրանի միջեւ կան որոշակի խնդիրներ. «Թուրքիայի հետ դա տարածաշրջանում ազդեցության ոլորտի համար պայքարն է, Ադրբեջանի հետ՝ 20-միլիոնանոց համայնքի առկայությունը, ինչպես նաեւ Իսրայելի հետ սերտ ռազմա-տեխնիկական փոխգործակցությունը»: