ԱՄԷ-ն դատապարտել է Եվրամիությանը՝ երկիրը հարկային ապաստարանների սեւ ցուցակում ներառելու համար, տեղեկացնում է AFP-ն։
«Դա արվել է՝չնայած ԱՄԷ եւ ԵՄ սերտ համագործակցությանն այս հարցում եւ ԵՄ բոլոր պահանջների կատարմանն ուղղված ջանքերին»,- ասվում է պաշտոնական հայտարարությունում, որը մեջբերում է ԱՄԷ WAM պետական տեղեկատվական գործակալությունը։ «ԱՄԷ-ն նախկինի պես հավատարիմ է բարձրագույն միջազգային չափորոշիչներին հետեւելու իր վաղեմի քաղաքականությանը հարկման ոլորտում»,- ասվում է հայտարարությունում։ ԱՄԷ-ն «կշարունակի թարմացնել իր ներքին օրենսդրական բազան այս ուղղությամբ»։
Առանձին հայտարարությամբ ֆինանսների նախարարությունն ասել է, որ ԵՄ-ը կհանի ԱՄԷ-ն սեւ ցուցակից։ «ԱՄԷ-ն հասել է ակնառու հաջողությունների 2018 թվականին՝ միջազգային հարկային չափորոշիչներին իր հավատարմությամբ եւ թափանցիկությամբ»,- ասված է հաղորդագրությունում։
Ինչպես տեղեկացվել էր ավելի վաղ, նախօրեին ԵՄ-ն ընդլայնել է «հարկային ապաստարանների սեւ ցուցակը։ Ցուցակում ավելացվել են Արուբան, Բարբադոսը, Բելիզը, Բերմուդյան կղզիները, Ֆիջին, Մարշալյան կղզիները, Օմանը, Արաբական Միացյալ Էմիրությունները, Վանուատուն եւ Դոմինիկան։ Սեւ ցուցակում հայտնվածները ենթարկվում են ավելի խիստ վերահսկողության ԵՄ-ի հետ գործառնություններում։