Ներկայացված օրենքների փոփոխությունների նախագծերին Հայաստանի իշխանությունները չեն արձագանքում: Մարտի 20-ի լրագրողների հետ հանդիպմանն այս մասին ասաց Տնտեսական իրավունքի կենտրոն» հասարակական կազմակերպության նախագահ Մովսես Արիստակեսյանը:
Նրա խոսքով՝ Ազգային ժողովից ուղարկված նախագծերին ի պատասխան հայտնում են, որ էլեկտրոնային նամակները պաշտոնական փաստաթուղթ չեն, ուստի հնարավորություն չկա դրանցով քննարկում կազմակերպել:
Փորձագետը նշեց, որ տնտեսական հեղափոխության իրականացման համար գլխավոր խոչընդոտներից մեկը առկա ֆինանսական համակարգն է, որը բնակչությունից «արյուն է քաշում»:
«Այս համակարգը հանգեցրել է նրան, որ այսօր քաղաքացիները հնարավորություն չունեն Նիկոլ Փաշինյանին օգնել տնտեսական հեղափոխության իրականացման հարցում», - ընդգծեց նա:
Նա հավելեց, որ մեծ խնդիր է նաեւ վարչապետի շրջապատը, որը տնտեսության համար աղետաբեր հարկային փոփոխություններ է առաջարկում.
«Հավասարաչափ հարկման համակարգը կհանգեցնի նրան, որ Հայաստանի ամենաապահով քաղաքացիների փոխարեն, որոնց թիվը տատանվում է 1700-2000-ի շրջանում, ստիպված կլինեն վճարել այլ մարդիկ:
Այդ փոփոխությունների արդյունքում բյուջեն մոտ 27 մլրդ դրամ չի ստանա», - պարզաբանեց նա: Ըստ փորձագետի, դա կհանագեցնի նրան, որ իշխանությունները կփորձեն լրացնել բացը, օրինակ գազավորված ըմպելիքների ակցիզների միջոցով: