Արդեն հեղափոխության մեկ տարին լրանում է, բայց ոչ մի բան չի փոխվել, միայն վատացել է։ Այս մասին այսօր՝ մարտի 21-ին, լրագրողների հետ հանդիպմանն ասաց քաղաքական գործիչ Գուրգեն Եղիազարյանը։
«Եթե Նիկոլին թվում էր, թե իր իշխանության գալով կյանքը կանգնելու էր, երկրագունդը չէր պտտվելու, ինքը չարաչար սխալվում է, ինքը ճգնաժամը երկրում խորացնում է, եւ մենք մի քանի ամսից հանցագործություն ենք գրանցելու։ Ինքը գտնվում է վատ վիճակում եւ Աստված չանի՝ այդ վատ վիճակն անդրադառնա Հայաստանի վրա»,–նշեց նա։
Գուրգեն Եղիազարյանը համոզված է, որ եթե ՀՀ վարչապետ Նիկոլ Փաշինյանը հայտարարում էր, թե Հայաստանը լցված է օտարերկրյա գործակալներով, նախ պետք է իրենից սկսի։ «Եթե խոսում ես գործակալներից, նախ քեզանից սկսի, թե դու ով ես։ Ես սա մեկ դերասանի թատրոն եմ համարում, սցենարը միջինից բարձր է գրված, սցենարիստները մի քանիսն են եղել, հիմնականում՝ տիկին Լարիսան։ Տիկին Լարիսան էլ է ասում, որ ինքը կանգնած է եղել հեղափոխության ակունքներում։ Եթե վարչապետն անկեղծանա հպարտ քաղաքացիների առաջ, պարզ կդառնա, թե ինքն ով է։ Եթե այդպես չէ, դու ինչպե՞ս ես համարձակվում սորոսականներով լցնել կառավարությունը, եթե Սորոսը Ալիեւ ավագի լավագույն ընկերն է եղել»։
Հիշեցնենք, որ Իրան կատարած այցի ժամանակ ՀՀ վարչապետ Նիկոլ Փաշինյանը հայտարարել էր, որ Հայաստանում օտարերկրյա գործակալներ կան։