Հնդկաստանի կողմից հակաարբանյակային զենքի փորձարկման ժամանակ բեկորների հետ ՄՏԿ-ի բախման հավանականությունը մեծացել է ավելի քան 40 տոկոսով, հայտարարել է ՆԱՍԱ-ի ղեկավար Ջիմ Բրայդենսթայնը:
«Մենք ժամ առ ժամ ավելին ենք իմանում բեկորների մասին, որոնք գոյացել են այդ հակաարբանյակային փորձարկման հետեւանքով: Ըստ անցյալ շաբաթվա տեղեկությունների ՆԱՍԱ-ի եւ տիեզերական գործողությունների միացյալ կենտրոնի փորձագետների գնահատմամբ՝ Միջազգային տիեզերական կայանի համար վտանգը մեծացել է 44 տոկոսով»,- ուղիղ եթերում ասել է Բրայդենսթայնը, փոխանցում է «ՌԻԱ Նովոստի»-ն:
Նա պարզաբանել է, որ խոսքը մանր բեկորների հետ կայանի բախման սպառնալիքի մասին է:
Նա, միաժամանակ, շեշտել է, որ ՄՏԿ-ում գտնվող ՆԱՍԱ-ի տիեզերագնացները անվտանգության մեջ են եւ հավաստիացրել, որ անհրաժեշտության դեպքում ՆԱՍԱ-ն կարող է կայանի մանեւրում կատարել, բայց դա «քիչ հավանական» է համարում:
Անցյալ շաբաթ Հնդկաստանի վարչապետ Նարենդրա Մոդին հայտարարել էր, որ երկրում արտադրված հրթիռը մերձերկրային ուղեծրում հաջողությամբ խոցել է արբանյակը: Նա այս իրադարձությունը պատմական էր որակել: Նրա խոսքով՝ մինչ այդ աշխարհում միայն երեք երկիր էին հասել նման ձեռքբերումների՝ ԱՄՆ-ն, Ռուսաստանը եւ Չինաստանը:
