Մյունհենի Տեխնիկական համալսարանի ուսանողները մշակել են հավելված, որը համացանցում գտնում է «Գահերի խաղը» հանրահայտ սերիալի մասին տվյալներ եւ օգտագործում է ալգորիթմ, որպեսզի կանխատեսի, թե որ հերոսները ողջ կմնան մինչեւ սեզոնի վերջը՝ հայտնում է AP-ը։

Նախագծի ղեկավար Գայ Յաչդավը ասել է, որ գոյատեւման ցուցանիշները կանխատեսվում են կյանքի տեւողության հիման վրա՝ նման այն գիտական հետազոտություններին, որոնք օգտագործվում են դեղորայքային բուժման արդյունքներն ուսումնասիրելու համար։ Նրա խոսքերով, թեեւ վերլուծությունը «հիմնված է ֆանտազիայի աշխարհից վերցված տվյալների վրա, իրական աշխարհում օգտագործվում են արհեստական ինտելեկտի մեթոդները»։

Հետազոտությունների տվյալների համաձայն, ողջ մնալու ամենամեծ հնարավորությունը վերջին սեզոնում ունի վիշապների մայրը՝ Դեյեներիս Թարգարիենը՝ 99 տոկոս, կարող են ողջ մնալ նաեւ՝ Թիրիոն Լանիսթերը, Վարիսը, Սեմ Թարլին, Ջեմի Լանիսթերը։

Ամենայն հավանականությամբ, կզոհվեն՝ Բրոննը, Գրեգոր Քլիգանը, Սանսա Սթարքը, Բրան Սթարքը, Սանդոր Քլիգանը։