Եվրամիությունը Վաշինգտոնին զգուշացրել է, որ ցանկացած քայլ, որով ԱՄՆ քաղաքացիներին թույլ կտրվի դատի տալ Կուբայի հետ բիզնես վարող արտասահմանյան ընկրություններին, կարող է հանգեցնել հայցի ԱՀԿ-ում եւ հանդիպակաց հայցերի շարքի եվրոպական դատարաններում, փոխանցում է Reuters-ը:
ԵՄ-ն լուրջ մտավախություններ ունի ԱՄՆ նախագահ դոնալդ Թրամփի որոշման պատճառով՝ 1996 թվականի Հելմս-Բերթոնի օրենքի կասեցման պրակտիկան վեց ամսով դադարեցնելու մասին, որը նման հայցերը թույլ է տալիս: Այս օրենքը ամերիկացի քաղաքացիներին թույլ է տալիս ԱՄՆ դատարաններ հայցեր ներկայացնել ցանկացած արտասահմանցու դեմ, որը 1960-ական թվականներին Կուբայի կողմից ազգայնացված ԱՄՆ սեփականության «վաճառք» է կատարում:
ԵՄ դիվանագիտության ղեկավար Ֆեդերիկա Մոգերինին եւ առեւտրի հարցերով եվրահանձնակատար Սեսիլիա Մալմսթրեմը նամակ են ուղարկել ԱՄՆ պետքարտուղար Մայք Պոմպեոյին: Նրանք Վաշինգտոնին կոչ են արել միանալ 1998 թվականի համաձայնագրին ԵՄ ընկերություններին եւ քաղաքացիներին հետեւողական բացառություններ տրամադրելու մասին:
«Հակառակ դեպքում ԵՄ-ն ստիպված կլինի սեփական շահերը պաշտպանելու համար օգտագործել իր տրամադրության տակ եղած բոլոր միջոցները, այդ թվում՝ այլ միջազգային գործընկերների հետ համագործակցությամբ»,- նշված է նամակում:
