Առաջին հերթին ուզում ենք ճշտել ժողովրդի դիրքորոշումը, թե որքանով է ընդունում, որքանով չի ընդունում իմ մասնակցությունը Ղարաբաղի նախագահական ընտրություններին, նոր դրանից հետո հանրաքվե է լինելու, պարզելու ենք իմ մասնակցության հնարավորությունը: Այս մասին, այսօր՝ ապրիլի 19-ին, լրագրողների հետ զրույցում նշեց ԼՂՀ Պաշտպանության բանակի նախկին հրամանատար, գեներալ–լեյտենանտ Սամվել Բաբայանը՝ անդրադառնալով 2020 թվակաին Արցախի նախագահական ընտրություններին իր մասնակցության հարցին:
«Դեռ մեկ տարի կա, այդ ժամանակ այնքան բան կարող է փոխվել, հիմնական մրցակիցները փոխվեն»,-ասաց նա:
Դիտարկմանը, որ Արցախի իշխանությունները նշել են, որ ինքն իրավունք չունի մասնակցել այդ ընտրություններին, քանի որ վերջին 10 տարում Արցախում մշտապես չի բնակվել, Բաբայանն ասաց. «Մենք պատրաստվում ենք օրենքով շարժվել: Առաջին հերթին, երբ ես Հայաստանում մասնակցել եմ ընտրությունների, այն ժամանակ էլ Հայաստանում 5 տարվա կացություն չեմ ունեցել, ուրեմն Հայաստանն էլ պետք է արգելեր: Մենք մի երկիր ենք եւ հիմա այդ մարդկանց փորձում ենք հասկացնել, որ ընտրական իրավունքը բոլորի համար հավասար պահեն: Ես բարձրաձայնեցի, որ Ղարաբաղի այսօրվա գործող ղեկավար Բակո Սահակյանը 1999 թվականին եկել է Մոսկվայից, ո՞նց է 2007 թվականին դարձել Ղարաբաղի նախագահ, երբ 10 տարվա կացություն չի ունեցել: Ժամանակ առ ժամանակ եկել-գնացել է: Ես էլ ժամանակ առ ժամանակ գնացել-եկել եմ Ղարաբաղ»:
Հարցին, թե իրեն հատո՞ւկ են խոչընդոտում, նա արձագանքեց. «Ես կարծում եմ՝ սա անում են, որովհետեւ իմ մասնակցության դեպքում կարող է լուրջ մրցակցություն լինի»: Սամվել Բաբայանը նշեց, որ ոչ մեկին իրեն լուրջ մրցակից չի համարում:
«Պետք է սահմանադրությունը փոխվի, որ Արցախի եւ Հայաստանի յուրաքանչյուր քաղաքացի իրավունք ունենա Արցախի նախագահի ընտրություններին մասնակցել:
Ստորագրահավաքը կանենք, կներկայացնենք, դուք էլ կհետեւեք զարգացումներին: Պարոն Բաբայանն իր համար չի փոխում Սահմանադրությունը: Այսօր շատ երեխեք կան, նույն ղարաբաղցիներ, որ Հայաստանում եկել 4 տարի սովորել են, ու հիմա իրավունք չունեն մասնակցել խորհրդարանական ընտրություններին: Դուք դա ճի՞շտ եք համարում: Տվեք հնարավորություն մասնակցել եւ պարտվել, թե՞ գիտեք, որ հաղթելու ենք, դրա համար երկու ոտքը դրել եք մի կոշիկի մեջ, որ ի՞նչ: Գնալու ենք, բոլոր այդ բարիերները անցնելու ենք»:
Հարցին, թե երբ է սկսվելու ստորագրահավաքը՝ Արցախի Սահմանադրությունը փոխելու համար, նա պատասխանեց. «ԿԸՀ-ն մի որոշում է կայացրել, որ ստորագրահավաքը լինի մեկ պատուհանով: Մենք դա բողոքարկել ենք, փորձելու ենք դա օրենքի դաշտ տեղափոխել: Ցանկություն չկա անօրեն քայլերի գնալ, դրա համար հետաձգել ենք ստորագրահավաքը: Այս ստորագրահավաքը նաեւ պատասխանելու է հարցին, հիմա Ղարաբաղը Հայաստանի հետ միասին է, թե առանձին»:
